Ertzaintzak 19 urteko gazte bat atxilotu zuen atzo goizean Agurainen (Araba), sexu eraso bat egitea eta bikotekidearekiko urruntze agindua urratzea egotzita. Biktima ospitalera eraman zuten, zaurituta. Astearte goizaldean jaso zuten abisua larrialdietan, eta Ertzaintzak egun horretan bertan atxilotu zuen ustezko erasotzailea. Atxilotuak aurrekariak zituen indarkeriagatik.
Eusko Jaurlaritzako Segurtasun Sailak jakinarazi duenez, gizonezkoa gaur goizean utzi dute indarkeriaren arloko Gasteizko epaitegiaren esku.
Tratu txarrengatik zigortua
Nafarroako Justizia Auzitegi Nagusiak lau urteko kartzela zigorra ezarri dio 45 urteko gizon bati, bikotekideari tratu txarrak emateagatik eta Iruñerriko herri batean sexu eraso bat egiteagatik.
Fiskaltzak, akusazio partikularrak eta defentsak adostasunez eman dute epaia, eta gizona ohiko tratu txarren delituagatik eta sexu erasoen delitu batengatik zigortu dute. Aringarritzat jo dute biktimari «egindako kaltea konpondu izana»—erantzukizun zibil gisa, 30.000 euroko kalte ordaina eman zion— eta alkoholarekiko eta substantzia estupefazienteekiko mendekotasuna izatea.
Epaitegiak ebatzi duenez, gizona ezin izango da biktimarengana hurbildu 400 metrora baino gutxiagora, ez eta harekin komunikatu ere bederatzi urtean, eta, gainera, zaintzapeko askatasunaren neurria bete beharko du beste zortzi urtez.
