Aimar Jabalerak eta Joseba Goikoetxeak irabazi dute BERRIA Txapelketako erremonte finala, Hernaniko Galarreta pilotalekuan (Gipuzkoa). Harmailak gainezka zirela, tentsioz jositako partida jokatu dute, eta merezita gailendu dira Urtzi Gurrutxagaren eta Aitor Aiestaranen kontra. Pronostikoen arabera, faborito zen bikote gipuzkoarra, baina urduritasunak nahi baino gehiago eragin diete biei ala biei, eta horixe bera baliatu dute txapeldunek podiumaren goiko koskara igotzeko. Oso erraz irabazi dute lehen jokoa, baina ez dituzte nahi ordurako jantzi txapelak. Besteak beste, azken jokoan erabaki baita guztia. Oraindik ere 22 urte soilik izanagatik, finalaren zama bere gain hartu du Jabalerak, eta ez du hutsik egin. Aparteko abiadura eman dio pilotari, eta Goikoetxea VI.ak ongi lagundurik, merezita joan dira txapelak txapeldunen buruetara.
Espero baino errazago eta azkarrago joan da lehen jokoa. Gurrutxagak eta Aiestaran VI.ak sekulako sendotasuna erakutsia zuten gaur arte, baina finalean ez dute gehiegizko konfiantzarik azaldu. Oso galtzaile ibili dira hasieratik, eta Jabalerak eta Goikoetxea VI.ak zinez eskertu dute hori. Atzelariak ongi bideratu ditu sakeak, guztira bost tanto egin baititu sakeari esker, eta Jabalerak ere ez ditu alferrik galdu aurreko koadroetan izandako aukerak. Lehen mailako kolpea daukala berretsi du, eta galtzaileak hari aurre egin ezinda ibili dira une oro. Azkenean, lehen jokoa aise irabazi dute Jabalerak eta Goikoetxea VI.ak: 15 eta 4.
Emaitza ez ezik, jokoa ikusita ere ez zirudien finalak emozio askorik izango zuenik, baina egoki erreakzionatu dute Gurrutxagak eta Aiestaran VI.ak bigarren jokoan. Haiek ere gazteak izanagatik, egokitasuna azaldu dute kantxan, eta lana oinarri hartuta egoera irauli dute. Aiestaran VI.ak pilota oso gutxi galdu du, eta Gurrutxagak babak eltzetik atera ditu. Oso dotore bideratu ditu pilotakada gehienak ezker hormara, Jabalera jokoz kanpo utziaz, eta Goikoetxea VI.ak ezer gutxi egin ahal izan du. Txapeldunek estutu dute jokoa azken txanpan, baina gorriei ez die ihes egin puntuak: 15-12.
Jabaleraren ahala
Gauzak hala, guztia irekita zegoen hirugarren eta azken setari begira, eta Jabaleraren ahala nabarmendu da, ezeren gainetik. Doneztebeko aurrelariak ondo baino hobeto erakutsi die pilotazaleei nolako ahalmena duen. Abiadura ikaragarrian ibili du pilota eta, horrez gain, jarrerari dagokionez ere lehen lerroko pilotari baten dohainak agertu ditu. Askotan atzelariarenak ziren pilotak jo ditu, eta haren lanari esker 8-1 irabazi dute txapeldunek azken jokoa. Goikoetxea VI.ak ere nabarmentzeko lana osatu du, profesionaletarako jauzia egin berritan, maila dotorea eskaini baitu. Jabalera pozez zen txapela jantzi berritan: «Iritsi berria naiz enpresa honetara, eta jada txapeldun izatea izugarria da, ez bainuen bela pentsatuko hau lortuko nuenik. Finala tentsio handikoa izan da, eta pozik geratu naiz emandako mailarekin. Hobetzen jarraitzea dut orain helburu».
