Berria Erremonte Txapelketaren beste aldi bat hasiko da bihar Galarretan, lehenengo partidarekin. Jaialdia 16:30ean hasiko da, Hernaniko frontoian (Gipuzkoa), eta txapelketako partida eguneko lehenengoa izango da. Irazu-Zaldua bikotea Jabalera-Goikoetxea VI.a bikotearen aurka lehiatuko da.
Sei bikotek jokatuko dute Berria Erremonte Txapelketa, eta bi taldetan daude banatuta. Biharko partida A taldekoa da, eta multzo horretako hirugarren bikotea Susperregik eta Apezetxeak osatzen dute. Hauek dira B taldeko beste hiru bikoteak: Arluziaga eta Zubiri, Gurrutxaga eta Aiestaran VI.a, eta Zaldua II.a eta Eskudero.
Ligaxka bihar hasiko da, eta beste lau egunetan ere jardunaldiak jokatuko dira: martxoaren 16an, martxoaren 22an, martxoaren 29an eta apirilaren 6an. Bikote bakoitzak bi norgehiagoka jokatuko ditu lehenengo fasean, eta, beraz, lehenengo partidak berebiziko garrantzia du sailkapenari begira. Bi bikotek lortuko dute finalerdietarako sailkatzea, eta aurreneko garaipenak ia parez pare irekiko ditu sailkatzeko ateak.
Ligaxkako sailkapena puntuen bidez osatuko da, eta set formatuan jokatuko da. Talde bakoitzean, puntu gehien duten bi bikoteak sailkatuko dira apirilaren 13ko finalerdietarako. Finala apirilaren 20an izango da, baina, aurretik, partidak irabazi behar dira, eta, horretarako, lehenengo pausoa bihar eman behar dute Irazu-Zaldua eta Jabalera-Goikoetxea VI bikoteek.
Biharko jaialdian beste bi partida jokatuko dira, eta, bigarrenean, jokatu berri den Masters txapelketako finalistak arituko dira: Ansa II.a eta Azpiroz erremontistak Segurolaren eta Barrenetxea IV.aren kontra lehiatuko dira.
