Vocento taldeak 70 langile kaleratu nahi ditu egunkariak inprimatzen dizkion Zamudioko errotatiban, Bizkaian. 129 langilek egiten dute lan Comeco Grafico Norte enpresan, eta lan erregulazioko espedienteak 70 behargini eragingo die. Taldeak ekonomia, produkzio eta antolamendu arrazoiak eman baditu ere, ELAk eta CCOOk salatu dute ez dagoela justifikatuta.
Bi sindikatuek ohar bana argitaratu dute kaleratzeak salatzeko. ELAk gogora ekarri du hamahiru milioi eurotik gora irabazi zituela iaz Vocentok. ELAren arabera, komunikazio taldeak produkzio kostuak merkatu nahi ditu, eta produkzioa beste enpresa batzuetara aldatu nahi du. «Arrazoirik gabeko planteamendu bidegabe horren aurka egingo dugu».
CCOOren arabera, kontuak orekatu nahi ditu enpresak, eta langileen lepotik etekin gehiago lortu nahi ditu. «Arriskuan jartzen du langileen etorkizuna, eta azken hiru hamarkadatan funtsezkoa izan den produkzio lantokiarena berarena ere». Sindikatuak uste du «traizio» egin diela eguneroko lanaren bidez enpresa garatu duten pertsona guztiei, eta konpromiso sozialik ez izatea aurpegiratu dio enpresari.
ELAk zein CCOOk dei egin diete langileei protesta egitera, kaleratze horiek geldiarazteko asmoz. Inprimategiaren jarraipena jokoan dagoela deritzote.
