Hitzen ondoren, ekintzak. Donald Trumpek jarritako %34ko muga zergari erantzungo ziola agindu zuen Txinak, eta neurri horretako tarifa gehigarri batekin erantzun die AEBei. Gainera, Merkataritza Ministerioak iragarri du debekatu egingo duela lur arraroen zazpi mota AEBetara esportatzea, eta Txinan aritzea debekatuko dio beste enpresa sorta bati. Berehala erreakzionatu du AEBetako presidenteak, ohi duen harrokeriarekin: «Txinak oker jokatu du. Beldurtu egin dira, eta egin behar ez zuten bakarra egin dute», hori zioen mezua idatzi du Truth Social sare sozialean.
Beste mezu bat ere bota du AEBetako presidenteak: «AEBetara zatozten eta dirutzak inbertitzen ari zareten inbertsiogileei: nire politikak ez dira inoiz aldatuko. Inoiz baino gehiago aberasteko garai bikaina da». Uler daiteke mezua ohar bat dela muga zergak negoziatzeko tresna hutsa dela uste izan dutenentzat, erakusteko nazioarteko merkataritza harremanak hankaz gora jartzea dela Trumpen asmoa.
Azken horien artean daude finantza merkatuak: pozez hartu zuten buruzagi errepublikanoa Etxe Zurira itzultzea, baina bere politikak indarrean jarri dituenean, izuz erantzun dute: atzo 2,5 bilioi dolarreko kapitalizazioa galdu zuten AEBetako burtsetan kotizatzen duten enpresek, Apple buru zutela (-300.000 milioi). Odolusteak berdin jarraitu du gaur: %4tik gora galdu dute Europako burtsek, eta inguru horretan ari dira erortzen AEBetakoak ere.
Muga zerga berriek ito egingo dute AEBen eta Txinaren arteko merkataritza, dagoeneko indarrean zeudenei batuko zaizkielako. Ondorioz, Txinako produktuek batez beste %76ko tarifa ordaindu beharko dute AEBetan, eta, kontrara, %50ekoa AEBetakoek Txinan.
Negoziazio batek bi erraldoien arteko talka eragozten ez badu, hausturak planeta osoan izango du eragina, batek zein besteak merkatu berriak bilatu beharko dituztelako beren produktuentzat. Europako Batasuna bereziki kezkatuta dago Txinako produktu merkeen etorreraz, bere ekoizle batzuk kinka larrian jar ditzakeelako. Horri erantzuteko modua bilatu behar du, baina Txinarekin gerra komertzialik hasi gabe.
EB, Asia erdialdera begira
Kontua da AEBek nazioarteko merkataritzari erakutsitako mespretxuak berekin ekar dezakeela beste herrialdeen arteko harremanak handitzea. Horretan hasia da EB bera. Mercosurrekin egindako hitzarmenaren aurkako hotsak isiltzen ari diren honetan, bazkide berrien bila ari da Batasuna. Asia erdialdeko herrialdeetan, esaterako; Trumpen iragarpenek Uzbekistanen harrapatu dute Ursula von der Leyen Europako Batzordeko presidentea.
Europako Batasunaren eta Asia erdialdeko errepubliken arteko goi bilera, atzo, Samarkandan. KIRGIZISTANGO LEHENDAKARITZA / EFE
Gaur, goi bilera izan du Samarkada hirian Uzbekistan, Kazakhstan, Tadjikistan, Kirgizistan eta Turkmenistango buruekin. Haiei esan die EB «bazkide fidagarria» dela, eta hori oso garrantzitsua dela harreman komertzialetan. Gainera, ziurtatu die EBren asmoa ez dela eremuko baliabide ugariak besterik gabe ustiatzea, baizik eta lehengai horiek eraldatuko dituzten industriak eta ikerketa laborategiak sustatu nahi dituztela.
Von der Leyenek nabarmendu du EB Asia erdialdean inbertitzen ari dela, eta pare bat adibide jarri ditu: batetik, gerriko berde bat sortzen ari da Aral itsasoa erabat desager ez dadin, eta bi urtegi eraikitzen ari da ur banaketa hobetzeko; bestetik, Transkaspio trenbidea eraikitzen lagundu du, Asia erdialdeko produktuak Europara joateko Errusiatik igaro gabe.
