Trapagarango (Bizkaia) MFS Sintering enpresan greba mugagabea hasiko dute datorren asteazkenetik aurrera. Lantegiak 106 behargin ditu, eta konkurtsoan dago. Urtarrilaren amaieran, administratzaileak langile batzordeari jakinarazi zion enpresa itxi eta langile guztiak kaleratzeko espediente bat prestatzen ari zela.
Txosten horren kontsulta aldia hasi baino egun batzuk lehenago abiatuko dute greba, langileen «gehiengo zabal batek» babestuta, ELAk ohar batean jakinarazi duenez. Sindikatuak gogoratu duenez, lantegi horretan «antzeko egoera bat» izan zuten 2023. urtean. Orduan ere, enplegua erregulatzeko espediente bat aurkeztu zuen zuzendaritzak, langile guztiei eragiten ziena, baina atzera egin zuen, «langileen borrokarengatik». «Lantaldea antolatu egin zen, eta greba deialdi bat egin. Oraingoan ere garbi daukagu antolakuntzak eta mobilizazioak aldarazi egingo dituztela enpresaren erabakiak».
Enpresa likidazio fasean dago iazko ekainaz geroztik. Urtebete luze darama langileei soldatak ordaindu gabe.
MFSk autogintzaren sektorean dihardu: piezak egin eta ingeniaritza zerbitzuak eskaintzen ditu, eta Hidrogenoaren Euskal Korridorearen proiektuetako bateko kide da.
LABek ere salatu du egoera, eta enpresa «bideragarria» dela defendatu du. Sindikatuak susmoa du inbertsio funtsen bat lantegia edo lurzorua erosteko asmotan dabilela. Amazonen biltegi handia dagoen ingurune berean dago MFS, eta hark uste du oso erakargarria izan daitekeela logistika arloko enpresentzat.
