Atzo, Euskal Herrian 22:00ak pasatxo zirenean gertatu zen ezbeharra, Moskuko Vnukovo aireportuan. Christophe de Margerie Total enpresako presidentearen hegazkin pribatua elurra kentzeko makina batek harrapatu zuen aireratzen ari zenean. Hiru lagun gehiago ere bazeuden hegazkinean, eta haiek ere hil ziren. Elurra kentzeko makinako gidaria onik atera da. Mozkortuta zegoen, eta, lehen hipotesien arabera, giza akats batek eragin zuen ezbeharra.
Atzerriko inbertsioei buruzko jardunaldi batzuetatik Parisera bueltan zihoan Frantziako petrokimika arloko enpresako presidentea. Hain zuzen, negozio bolumena kontuan hartuta, euroguneko enpresarik handiena da Total: 111.000 langile inguru ditu, eta 130 herrialdetan aritzen da. De Margeriek 63 urte zituen.
