Europako Batzordeak jakinarazi du bertan behera geratu dela Tiktoken aurkako auzietako bat. Salaketak ikusirik, sare sozial horrek erabaki du erabilera saritzeko puntuazio programa erretiratzea. Adikzioa eragin zezakeela leporatzen zioten.
Txinako Byte Dance konpainia da Tiktoken jabea, eta harekin erlazionaturiko beste bertsio bat jarri zuen martxan apirilean Euskal Herrian, Espainian eta Frantzian, Tiktok Lite izenekoa.
Alta, berehala kezka piztu zuen ea urratzen ote zuen Europako Zerbitzu Digitalen Legea. Lege horrek erabiltzaileen eskubideak biltzen ditu, eta lehia askerako eremu juridikoa mugatzen.
«Gazteen denbora erabilgarria ez da sare sozialetan egoteko truke txanpona, eta ez da izango. Saritze programa hori kentzea lortu dugu»
THIERRY BRETONEuropako Batzordeko Barne Merkatuko komisarioa
Bruselan alarmak piztu, eta prozedura ireki zuten. Tiktoken enpresa jabeari leporatzen zaio haren arriskuak aztertu aurreko txostena izan aurretik merkaturatu zuela Lite bertsioa. Pantailaren aurrean pasatutako denboraren araberako puntu programa zeukan, erabilera saritzeko: atsegin dut botoia sakatzeagatik, eduki sortzaileei jarraitzeagatik eta aplikazioan bat egitera gonbidatzeagatik, besteak beste.
«Gazteen denbora erabilgarria ez da sare sozialetan egoteko truke txanpona, eta ez da izango. Saritze programa hori kentzea lortu dugu», nabarmendu du Thierry Breton Barne Merkatuko komisarioak. Lehen aldia da Europako legedia aplikatuz prozedura bat bertan behera geratzen dena.
Tiktokek Lite bertsioari eutsi dio, baina sariak eta puntu programak kentzea erabaki du, eta zin egin du ez duela horrelako sistemarik berriz jarriko. Europako Batzordeak iragarri du erne zainduko duela ea konpromiso hori betetzen duen.
Beste prozedurak
Gainera, zabalik dago otsailaren 19an irekitako beste prozedura. Auziak zerikusia du adingabeen babesarekin, publizitate gardentasunarekin, ikertzaileentzako datuak eskura izatearekin, diseinu erakargarriak sor dezakeen adikzio arriskuarekin eta eduki kaltegarriekin.
Beste prozedura batzuk ere badaude hainbat sare sozialen aurka, ustez Zerbitzu Digitalen Legea urratzeagatik: X, AliExpress eta Meta.
