«Luzapenean gaude honezkero». Sunsundeguiko langileen batzordeak ohartarazi du oso denbora gutxi geratzen dela Altsasuko fabrika eta bertako enpleguak salbatzeko. Apirilaren 14an hastekoa da likidazio prozesua, eta, horregatik, «azken ahalegina» egiteko eskatu diete Nafarroako Gobernuari, hartzekodunen konkurtsoko administratzaileari eta alderdiei oro har.
Aste hasieran, Molins eta Andres administratzailearekin bildu ziren likidazio prozesuaz hitz egiteko, eta asteazkenean, Nafarroako Gobernuarekin. Biek helarazi diete egoera oso larria dela. «Enpresak ez du etorkizunik inbertitzailerik ez badago», onartu dute batzordeko ordezkariek. Gogora ekarri dute enpresaren itxiera eta langileen kaleratzea «kolpe handia» izango dela Sakanako eskualdearentzat.
Izan ere, agerraldian nabarmendu dute likidazio prozesu bat abiatuz gero enplegua erregulatzeko espedientea irekiko dietela, eta kalte ordainak jasotzeko Fogasara jo beharko dutela, Sunsundegui leporaino zorpetuta dagoelako. Dena den, aldi berean, gogora ekarri dute Sunsundeguik produktu ona egiten duela eta langile profesional bikainak dituela. «Enpresa dugu, produktua dugu, lana dugu, talentua dugu. Nola utz dezakegu hori dena gal dadin?», galdetu dute.
Likidazioa hastear
Denbora amaitzen ari da. Hilabeteotan, fabrika bere gain hartzeko eskaintza ugarien artean bat nabarmendu da. Urtarriletik, Dumarey Belgikako taldeak interes handia agertu du; xehetasun ugariri buruz galdetu dio hartzekodunen konkurtsoko administratzaileari, baina gaur-gaurkoz ez du negozio eta industria planik aurkeztu.
Hori ikusirik, Molins eta Andres abokatu bulegoak likidazio prozesuari ekitea proposatu zion Iruñeko merkataritza arloko lehen auzitegiari, eta asteon langileen batzordeari helarazi dio apirilaren 14an hasiko dela. Horretarako, Sunsundeguin jarraitzen duten langileen kontratuak eteteko espediente bat abiarazteko kontsulta aldia hastear da.
Urritik, langileak aldi baterako espediente baten pean daude. Azken hilabeteetan, 50 langile inguruk enpresa utzi dute. Molins eta Andresek epaileari duela bi aste aurkeztutako txostenean zioenez, 341 langile geratzen ziren. Horrek adierazten du langileen nekea. Kontuan hartu behar da Sunsundegui ataka oso larrian egon zela 2013an.
Irujoren adierazpenak
Iruñean, Foro Ser Navarra-k antolatutako elkarrizketan, Sunsundeguiri buruz galdetu diote Mikel Irujo Nafarroako Gobernuko Industria kontseilariari, eta erantzun du «azken ordura arte» borrokatuko direla inbertitzaile bat lortzeko. Gogora ekarri du hartzekodunen konkurtsoan izaki epaileak hartu behar dituela enpresari buruzko erabakiak. «Badakigu Sunsundeguik industria bazkide bat behar duela etorkizuna izateko».
Egun, enpresak 50 milioi euro zor dizkie hartzekodunei. Horien artean nagusietakoa Nafarroako Gobernua da, Sodenari 13,4 milioi zor baitizkio enpresak.
