Bilera izan dute gaur Sunsundeguiko langileek enpresaren konkurtsoa daramaten administratzaileekin, eta entzun nahi ez zutena entzun dute haien ahotik: enpresa likidatu egingo dutela, zorrei aurre egiterik ez duelako. Data garrantzitsu batzuk ere badakizkite orain: apirilaren 14an hasiko da prozesua, eta hilaren amaieran gera daitezke lanik gabe. Gaur egun 341 behargin ditu Altsasuko autobusentzako karrozerien egileak, baina Sakana eskualdean (Nafarroa) beste asko ari dira harentzat zeharka lanean.
Likidazioa hasteak ez du derrigorrez esan nahi enpresa behin betiko itxiko dela, likidazio prozesuan ere agertu daitekeelako Sunsundegui bere gain har dezakeen inbertsiogile bat, baina horretarako aukerak gero eta urriagoak dira. Ostiral arratsaldean jakin zen atzera egin zuela interesa azaldu duen azken enpresak, Belgikako Dumarey taldeak, eta ez zuela eskaintzarik egingo.
2024ko azaroan sartu zen Sunsundegui hartzekodunen konkurtsoan, ez zelako gai 48,8 milioi euroren zorrari erantzuteko: 8,9 milioi zor dizkie hornitzaileei, eta 39,9 milioi finantza erakundeei eta hura laguntzen saiatu diren sozietate publikoei (Sodena, Cofides, ICO).
Lana, sobera
Paradoxikoa dirudien arren, ez du lan faltak hondoratu Altsasuko enpresa. Enkargu asko zituen —530 autobus, aurten—, baina ez zuen likideziarik ibilgailu horiek eraikitzeak eskatzen dituen gastuak estaltzeko, ezta dirurik ere inbertsioak egin eta ekoizpena handitu ahal izateko.
Enpresaren kutxak hutsik egoteak haren langileen kaleratze baldintzak okertuko ditu. Izan ere, Fogasa kaleratzeetarako funts publikoak hartu beharko ditu bere gain kalte ordainak, eta hark hogei eguneko soldata ematen du lan egindako urte bakoitzeko, eta hamabi hilabeteko soldataren adinakoa gehienez.
Sunsundeguiko langile batzordea —UGTk, LABek, ELAk eta CCOOk osatua— Sodenako ordezkariekin da biltzekoa bihar. Nafarroako Gobernuaren sozietate horrek 3,4 milioi euro jarri zituen enpresa salbatu ahal izateko.
