Iruñeko Gazteluko plazan elkarretaratzea egin dute gaur, LAB, CGT, Steilas, ESK, EHNE eta Hiru sindikatuek deituta, lan istripuetan jazotako azken heriotzak salatzeko.
Batez ere, erorketak salatu dituzte, asteartean bi langile hil baitziren, biak ere erorita, bata Loiun (Bizkaia) eta bestea Leozen (Nafarroa). Inko Iriarte LABeko Lan Osasuneko arduradunaren esanetan, «egoera larria da, bereziki Nafarroan, azken hiru urteetan hamar langile hil baitira beharrean ari zirela erorita».
Iriarteren aburuz, «patronalak ez du prebentzio legea betetzen, eta erorketak dira horren erakusgarri, haiek saihesteko prebentzio neurriak are ezagunagoak baitira». LABeko ordezkariak, «Nafarroan nahikoa baliabide izango dituen lan inspekzio bat» eskatu du, gogoratuz herrialdeak soilik hamar lan inspektore dituela.
