Guardian Glassek Laudion (Araba) duen fabrikako langile batzordea osatzen duten sindikatuek, hau da, ELAk eta LABek auzitara joko dute enpresak aurkeztu duen erregulazio txostena gelditzeko asmoz. ELAk bideratuko du auzibidea, batzordean gehiengoa haren esku dagoenez gero, eta, sindikatu horretako ordezkariek azaldu dutenez, zuzendaritzak erregulazioa egiteko arrazoiak «ez frogatzeagatik» jarriko dute salaketa.
Guardianek 177 langileei eragiten dien lan erregulazio bat aurkeztu zuen duela sei aste, eta atzo amaitu zen haren baldintzak negoziatzeko epea. Espero bezala, zuzendaritzak eta sindikatuek ez zuten akordiorik egin. Azken horiek esana zuten ez zutela kaleratzerik onartuko, eta haien arabera, konpainiak ez du besterik eskaini: «Aukera bakarra egon da mahaian: kalte ordainen truke kaleratzeak onartzea».
Erregulazioaren berri ematean, enpresak ekoizpen arrazoiak erabili zituen argudiotzat, eta adierazi ez zela bideragarria plantaren jardunaren oinarria den beira labearen matxurak konpontzea. Sindikatuek, baina, ez zuten onartu hori, eta esan zuten inbertsio txiki batekin konpon zitekeela.
Bi iritzi horien arteko talka da sindikatuek auzitara jotzeko erabilitako argudioetako bat. Hori horrela, epaileak ebatzi beharko du kaleratzeak bidezkoak diren, bidegabeak diren, edo prozesua bertan behera uztekoa den.
Hiru greba egun Bridgestonen
Bridgestonek Basaurin (Bizkaia) duen plantako langileek hiru greba egun deitu dituzte hurrengo bi asteetan: apirilak 8, 11 eta 15. 8an manifestazioa ere egingo dute. Langile batzordea osatzen duten sindikatuek (CCOO, UGT, BUB eta ELA) zuzendaritzarekin hastear dauden negoziazioen nondik norakoak ezagutu nahi dituzte, eta haien bilakaeraren arabera erabakiko dute lanuzte gehiago deitu ala ez. Pneumatiko konpainiak 335 langile kaleratzeko asmoa ezagutarazi zuen atzo; lantaldearen %40 da hori.
