Bi egun eskasean hamar dolar inguru amildu da Brent upelaren prezioa, 75 dolarretik 65 dolar ingurura, azken lau urteetako salneurri merkeenera. %15 inguruko jaitsiera da, Ukrainako gerraren hasieran, COVID-19aren agerraldian eta 2007ko krisietan ikusitako tupusteko aldaketen parekoa.
Trumpen muga zergen shockarekin, merkatu gehienetan jaitsi dira prezioak, baita lehengaietan ere, hasi elikagaietatik eta gas naturaleraino. Azkenean, espero izatekoa da merkataritza gerraren ondorioz ekonomia globala motelaldian sartuko dela, eta, ondorioz, eskaria murriztuko dela.
Baina horri gehitu behar zaio Trumpen Etxe Zuriko show-aren ondoren, ordu batzuk geroago, beste albiste bat ere iritsi zela: LPEE+ Lurralde Petrolio Esportatzaile Erakundeak eta haren aliatuek maiatzean petrolio ekoizpena aurretik esan baino gehiago handituko dutela.
Beraz, eskari txikiagoari eskaintza handiagoa batuko zaio: hori da petrolio merkeagoaren funtsezko arrazoia.
Printzipioz, maiatzerako jada espero zen petrolio kartelak ekoizpena handitzea, baina aurreikusitako igoera hirukoizteko erabakia hartu du, egunean 411.000 upel gehiago produzitzeko.
Saudi Arabiak zigortu egin nahi ditu Iran eta Kazakhstan, bi herrialde horiek hilabeteak daramatzatelako kartelak ezarritako ekoizpen kuotak gainditzen
Zergatik halako igoera? Dirudienez, Saudi Arabiak zigortu egin nahi ditu Iran eta Kazakhstan, bi herrialde horiek hilabeteak daramatzatelako kartelak ezarritako ekoizpen kuotak gainditzen. Nonbait, pazientzia galarazi diote Abdulaziz bin Salman Energia ministro saudiarabiarrari, eta Saudi Arabiarentzat beste herrialde horientzat baino eramangarriagoa da petrolio merkea, tarte baterako behintzat.
Aldagai horiei guztiei, gaur, Txinak AEBei erantzuteko ezarritako %34ko muga zergak gehitu zaizkie, eta horrek motelaldi globalaren kezka areagotu du, baita petrolioari beste bultzada bat eman ere beherantz.
Trumpen mehatxuak
Upelaren prezioa aldakortasun handia ari da nozitzen azken aste hauetan, eta ezin da baztertu petrolioak atzera laster iristea 70 dolarren maila. Izan ere, Etxe Zuriak mehatxuak egin ditu petrolioa ekoizten duten hainbat herrialderen kontra, hala nola Iranen eta Venezuelaren kontra, eta horiek betetzeak eskaintza murriztuko luke.
Errusiako petrolioa bera ere aipatu dute Washingtonen, Mosku Ukrainarekin negoziatzera behartzeko tresna gisa. Egoera horretan, petrolio merkeagoak halako neurriak hartzea errazten dio Trumpi, inflazioa eragiteko kezka txikiagotzen diolako.
Aldakortasunerako beste aldagai bat AEBetako petrolioaren ingurukoa izan daiteke, herrialdean haustura hidrauliko bidez ekoizten den petrolioaren errentagarritasuna desagertu egiten baita upelaren prezioa maila batetik behera jaisten denean.
