Apirilaren 9ko grebari begira, bost sindikatuek —LAB, Afapna, CCOO, ELA eta UGT— aldarrikatutako arrazoietako bati amore ematea erabaki du Nafarroako Gobernuak. Osasunaren foru lege aurreproiektuan proposatua zuen Osasunbidea eta NOPLOI Nafarroako Osasun Publikoko eta Lan Osasuneko Institutuaren izaera juridikoa aldatzea eta sozietate publiko gisa hartzea. Alta, orain gobernuak erabaki du asmo horretan atzera egitea eta egungo izaerari eustea.
Gaur goizean, Funtzio Publikoko Mahai Orokorraren bileran iragarri diete hori Rashid Mohamed Funtzio Publikoko zuzendariak eta Nacho Iriarte Osasunbideko Profesionalen zuzendariak bost sindikatuei. Hain zuzen ere, sindikatuak oso kritiko azaldu dira Osasunbideari eta NOPLOIri izaera juridikoa aldatzeko asmoaren inguruan. Etorkizuneko langile publikoen estatusa ere aldatu egingo zela argudiatu dute.
Legealdiko lege garrantzitsuenetako baten hasierako proposamenean txertaturik zegoen neurri hori. Osasunaren foru lege aurreproiektua bere bidea egiten ari da. Tramitazio horretan, sektoreko eragileen 1.100 ekarpen jaso dituzte, eta gobernuak prentsa ohar bidez jakinarazi du bi erakundeen izaera juridikoa bere horretan uztea erabaki duela; hots, hasierako asmoan atzera egin dute.
Behin horiek guztiak aztertuta, aldaketa guztiak osasunaren lege proiektuan bilduko dira, hark bere bidea egin dezan —gobernuak onartu egin behar du, eta parlamentuko eztabaidari bide eman—.
Beste bide bat
Dena den, bi erakunde horien eraginkortasuna hobetzeko helburuari eutsi nahi diote, eta azpimarratu dute hori «araudi aldaketen bidez» egingo dutela. Gobernu barruan Funtzio Publiko eta Ogasun departamentuekin hitz egiten egiten ari da Osasun Saila, «kudeaketarako autonomia eta sistema publikoaren iraunkortasuna bermatzeko neurriak aztertzeko».
Izan ere, gobernuaren helburua zen izaera juridikoaren aldaketaren bidez «autonomiarik handiena» ematea Osasunbideari eta NOPLOIri. Antolamenduari begira, malgutasun handiagoa lortu nahi zuten, tresnak eta giza baliabideak «hobeto kudeatzeko»: hala nola, kontratazioak eta egindako lana aztertzeko, materialen eta azpiegituren lizitazioaren gestiorako, plantillak definitzeko...
Sindikatuen iritziz, baina, neurri horrek guztiz alderantzizkoa ekarriko zuen. Uste zuten pribatizazioari eta erakunde horietako langileen prekarizazioari ateak irekitzen zizkiola, eta greba antolatzeko arrazoietako bat izan da. Ez da bakarra, ordea. Besteak beste, mahai orokorreko sindikatuek kritikatu dute langile publikoen estatutua berritzeko negoziazioak korapilatuta izatea, soldatak Nafarroako KPIaren arabera ez eguneratzea, eta behin-behinekotasuna %8ra murrizteko konpromisorik ez hartzea.
