Donald Trump AEBetako presidenteak asteon mehatxa egin du autoei %25eko muga zergak ezarriko dizkiela. Bere mehatxuetako asko betetzen dituela jakinik, Nafarroako Gobernuak iragarri du muga zergek autogintzan izango duten eragina neurtzeko mahaia sortuko duela.
Administrazio publikoek auto industria bultzatzeko har ditzaketen neurriei buruzko mahai inguru batean parte hartu du Mikel Irujo Nafarroako Gobernuko Industria kontseilariak, Madrilen (Espainia). Mintzaldian, hizpide izan dute gaur egungo jokaleku konplexua; besteak beste, Txinako konpainien lehia eta energiak etorkizuneko eraldatzean izango duen garrantzia.
Lehiakortasunaren erronkaren harira, Trumpek iragarritako muga zergek zer ondorio izango dituzten aztertu nahi dute, industriaren eskutik.
Irujok nabarmendu du Nafarroak aurrerapauso handiak eman dituela auto elektrikoaren salmentetan, baina oraindik «bide luzea» geratzen dela deritzo. Haren ustez, etorkizunak mugikortasun iraunkorraren ildotik jo behar du, «nahitaez». Hala, garrantzitsutzat jo du Nafarroako Volkswagen zer-nolako inbertsioa egiten ari den auto elektrikoaren produkziora egokitzeko.
