Baso lanetan ari zen beste behargin bat hil da, LAB sindikatuak jakinarazi duenez. Ezbeharra joan den asteazkenean izan zen, abuztuaren 14an, Iurretan (Bizkaia), baina sindikatuak gaur eman du istripuaren berri. Langilea autonomoa zen, eta zuhaitz baten adar bat erori zitzaion gainera, mozten ari zela. LABen zenbaketaren arabera, Euskal Herrian aurten 36 lagun hil dira lanean ari zirela.
Lan heriotza horren ingurukoak ikertzea eskatu du sindikatuak, baita baso lanetan aritzen direnen lan baldintzak eta lan erritmoak ere. Izan ere, gogorarazi du arriskua «handia» dela basogintzan, makina arriskutsuekin lan egiten dutelako besteak beste, lur malkartsuetan eta eguraldi txarrarekin maiz. Eta salatu du langileen lan baldintzak «gero eta eskasagoak» direla.
Bada, lan osasuneko politikak «errotik» aldatzea eta istripurik ez izateko neurriak hartzea galdegin die erakundeei eta arduradun politikoei. LABek dei egin du lan istripua salatzeko mobilizazioetan parte hartzeko.
