Atzo onartu zuen Espainiako Gobernuak lurraldeko hitzarmen kolektiboei lehentasuna emateko dekretua. Horrela bete zuen Pedro Sanchezen gobernuak haren inbestidurarako EAJrekin hitzartutakoa. ELAk atzo bertan txalotu zuen dekretua, eta «garaipentzat» jo.
LAB sindikatuak, berriz, gaur esplikatu du «argi-ilunak» ikusten dizkiola dekretuari. «Urrats bat da bertako hitzarmenei lehentasuna ezartzea. LABek behin baino gehiagotan aldarrikatu du euskal langileok gure lan baldintzak bertan erabaki ahal izateko eskubidea». Baina sindikatuaren ustez, dekretuak modua ematen du «bertako negoziazio kolektiboak estatukoaren mende jarraitzeko».
Izan ere, dekretuan jasotzen da «langilearen aldekoagoak» izatea dela lurraldeko hitzarmenek estatukoen gainetik lehentasuna izateko baldintza. Eta hor arriskua ikusten du LABek. «Euskal Herriari dagokionez bertako hitzarmenetako lan baldintzak oro har hobeak diren arren, eztabaida juridiko zabala izan daiteke onuragarriagoa zer den eta zer ez, eta horrek atea ireki diezaioke patronalak hain gustuko duen judizializazioari, eta segurtasun juridikorik ezari».
Hala ere, LABen aburuz, «testuinguru berriak aukera emango du bertako negoziazio kolektiboa babesteko eta jada estatalizatu diren eremuetan hitzarmen propioak berreskuratzeko».
CEOE, haserre
Madrilen, berriz, Espainiako CEOE patronalak –Confebask hartako kidea da– agiri bat atera du gaur, lurraldeetako hitzarmenei lehentasuna ezarri izana gaitzesteko. «Erabat arbuiatu» du, «aurrez abisatu gabe» eta «elkarrizketa soziala mespretxatuta» onartu delako.
CEOEren arabera, Espainiako Konstituzioak berak biltzen du negoziazio kolektiboan hainbesteko pisua duten aldaketak eragile sozialekin kontsultatzeko agindua. Aldaketa horiek ez ziren sartu Madrilgo gobernuak, patronalak eta sindikatuek egindako azken lan erreforman, zeina CEOEk onartu baitzuen «derrigorrezkoa zelako Europako funtsak jasotzen jarraitzeko».
Eta orain, «gobernuak paso egin du elkarrizketa sozialeko akordioez», patronalaren ustez. «Elkarrizketa sozialerako ezinbestekoa den leialtasuna eta konfiantza falta direla erakusten du horrek». Horrez gain, lurraldeetako hitzarmenak lehenesteak, CEOEren arabera, Espainiako merkatu batasunaren aurka egiten du. «Beraz, akordio politiko horrek Espainiako nazio kohesioa eta lehiakortasuna hondatuko ditu».
