Kutxabankek haizea alde du oraindik ere: 396,2 milioi euro irabazi ditu aurtengo lehen bederatzi hilabeteetan, iaz tarte berean baino %2,8 gehiago. Emaitza onen oinarrian banku negozioa dago, %16,4 hazi baita, 1.500 milioi euro mugitzeraino. Interes marjina ere hazi da tarte horretan, %23,4. Bankuaren arabera, zerbitzuen eta aseguruen alorra ere handitu da.
Kutxabanken urtea ondo doa, baina hirugarren hiruhilekoko hazkundea aurreko bietakoa baino apalagoa izan da, bai behintzat iazko hiruhilekoekin alderatzen bada. Aurtengo lehen hiruhilekoan iazkoan baino %8,5 gehiago irabazi zuen; lehen seihilekoan, berriz, mozkinen hazkundea %5,4 izan zen, eta, esan bezala, irailera arte pilaturiko mozkina %2,8 handiagoa izan da.
Bankuak emaniko datuen arabera, negozio arlo ezberdinetan hazi da. Esaterako, kontsumo maileguen negozioa %22,4 hazi da, banku korporatiboarena %3,7, eta enpresei emaniko maileguena, %6,1 (2.100 milioi euro). Azken hori garrantzitsua da, bankuak onartua baitu enpresei emaniko maileguen adarra hazkunderako gakoetako bat dela.
