Arabako, Bizkaiko eta Gipuzkoako sektore publikoan UGT ez beste sindikatuek antolatu duten grebaren behin-behineko balorazioa egin du Eusko Jaurlaritzak. Administrazio Orokorreko, Hezkuntzako, Osasuneko eta Segurtasuneko lanuztearen parte hartze datuak eman ditu Jon Agirre Lan Harremanen zuzendariak. Eguerdiko hamabi eta erdiak arteko datuekin osatu du argazkia gobernuak, eta, ohi bezala, ez dator bat sindikatuek emandakoarekin.
Izan ere, Eusko Jaurlaritzaren arabera, grebaren jarraipena honakoa izan da lan eremu horietan: Administrazio Orokorrean %12,03ko parte hartzea izan du soilik, Hezkuntzan %41,4koa, Osasunean %5,9koa, eta Segurtasunean %3,42koa (Ertzaintza salbu).
Datuak ez dira behin betikoak, arratsaldeko taldeen eragina neurtzea faltako delako. Nolanahi ere, Eusko Jaurlaritzak sindikatuei eskatu die «jarrera maximalistak» alde batzera uzteko, eta Mahai Orokorrean nahiz sektore bakoitzeko mahaietan negoziatzen jarraitzeko. Mahai horien deialdiak datozen hamabost egunetan egingo ditu Jaurlaritzak.
«Negoziazio foro guztiak irekita daude, eta Jaurlaritzak konpromiso osoa dauka langile publikoen lan baldintzekiko», esan du Agirrek. Eta gogorarazi du azken hamarkadan ehun itun baino gehiago egin dituztela Eusko Jaurlaritzak eta sindikatuek, sektore guztietan.
