Imanol Pradales Eusko Jaurlaritzako lehendakariak iragarri du «industria defendatzeko lantalde» bat martxan jarriko duela. Datorren astean izango du lehen bilera, eta bertan, Eusko Jaurlaritzak ez ezik, aldundiek, Arabako, Bizkaiko eta Gipuzkoako merkataritza ganberek, klusterrek eta «produkzio sarearen ordezkariek» hartuko dute parte. Hain justu, ostiral honetan Adegi Gipuzkoako patronalak antzeko foro bat sortzea galdegin du.
Eusko Legebiltzarreko kontrol saioan eman du bere egitasmoaren berri Pradalesek, EAJko Joseba Diez Antxustegiren galdera bati erantzunez. Hark Donald Trump AEBetako presidentearen muga zergen aurrean zer asmo dituen azaltzeko eskatu dio lehendakariari.
«Mundua mugitzen ari da, eta bloke itxietara doa, protekzionismora», adierazi du lehendakariak, eta egoera horren aurrean «herri» gisa eta «Europako Batzordearekin elkarlanean» erantzun behar dela nabarmendu du. «Larrialdi egoerek premiazko neurriak eskatzen dituzte».
Pradalesek adierazi duenez, lantaldeak hiru helburu izango ditu: AEBek iragarri dituzten muga zergen eraginari buruzko diagnostikoa partekatzea eta jarraipena denbora errealean egitea; enpresei laguntzeko dauden tresnak, baliabideak eta politikak identifikatzea; eta bertako industriaren gaitasunak eta aukerak indartzea. Funtsean, industriaren lehiakortasuna indartzea izango du xede egitasmoak.
