Jaurlaritzak 1.250 gazte erakarri nahi ditu lehen sektorera hamar urtean

Lehen sektorean belaunaldien arteko erreleboa bermatzea helburu duen plan bat aurkeztu dute Eusko Jaurlaritzak eta hiru foru aldundiek. 25 milioi euroko aurrekontua izango du datozen hiru urteetarako, eta hurrengo hamar urteetan sektorean 1.250 gazte sartzea du helburu.

Programak begiz joak ditu 1.500 ustiategi, bi baldintza hauek betetzen dituztelako: gaur egun ekonomikoki errentagarriak dira, eta jabeak erretiratuta edo erretirotik gertu daude. Ustiategi horien erdiek, gutxi gorabehera, ez dute erreleborik, Jaurlaritzaren kalkuluen arabera.

Amaia Barredo Elikadura, Landa Garapen, Nekazaritza eta Arrantza sailburuak azaldu duenez, bi sentsibilizazio kanpaina hasiko dituzte aurki, eta foru aldundiek bitartekaritza bulegoak sortuko dituzte ustiategi horiek eta lanean hasi nahi duten gazteak harremanetan jartzeko.

Laguntza ekonomikoak emateko planak ere aurreikusi dituzte. Gainera, Sendotu finantza tresnaren bidez, gazteentzako maileguei abala emango diote jardueraren lehen urteetan; guztira, 9,75 milioi euroren aurrekontua izango du. Datozen hilabeteetan, halaber, Nekazari Gazteen Estatutua aldatuko da.