Irizar e-mobilityk beste 11 autobus elektriko salduko dizkio Euskal Hirigune Elkargoari. Fabrikatzaile berak eginiko hemezortzi ibilgailuei batuko zaizkie. Autobus elektriko horiek denak Tramb'bus garraiobidean erabiliko dira. Irizarrek ezagutarazi du kontratu berria, baina ez du operazioaren kostuaren berri eman.
Ale berriak T1 Baiona-Miarritze-Angelu linearen maiztasuna handitzeko erabiliko dira, eta T2 Baiona eta Tarnose (Landak, Okzitania) lotzen dituen linea beste bost kilometro handitzeko, autobusak Basusarrira sar daitezen.
Ibilgailu berri guztiak elektrikoak izango dira, Irizar Ie Tram modelokoak, aurrekoak bezala. Zazpi unitate hemezortzi metro luze izango dira, eta gainerako laurak, hamabi metro luze. Irizar e-mobilityk Adunan (Gipuzkoa) duen fabrikan egingo dira oso-osorik, bateriak eta gainerako azpiegitura sistema guztiak barne.
Euskal Hirigune Elkargoak 2019. urtean jarri zuen martxan Tramb'bus garraiobidea. Txik Txak marka komertzialaren pean jarduten du, Euskal Hirigune Elkargoak kudeatzen dituen Ipar Euskal Herriko garraiobide sarean.
