Elkargi finantza erakundeak aitortu du kezkatuta dagoela industriaren sektoreak pisua galdu duelako beraren eragiketetan. Azken bost urteetan sektore horri mailegatu dion diruaren batez bestekoa %30etik %27ra apaldu da, eta iaz jaitsiera hori are nabarmenagoa izan zen. 2023an, 179,5 milioi euroren operazioak egin zituzten, urte hartako guztien %42; iaz, berriz, 112,2 milioirenak izan ziren, urtekoen %27. Beraz, urte batetik besterako jaitsiera %37,5 izan zen.
Lander Artetxe Elkargiko zuzendariak, dena den, alde baikorra ikusi nahi izan dio egoerari iazko jardunaren balantzearen berri emateko eginiko agerraldian: «Iaz ziurgabetasuna zen nagusi. Merkatu nagusien egoera ez zen ona, eta interes tasak oraindik altu zeuden. Pentsatu nahi dugu enpresek atzeratu egin dituztela inbertsioak, ez bertan behera utzi. Aurtengo lehen bi hilabeteetako datuak ditugu, eta iazkoak baino hobeak dira».
«Pentsatu nahi dugu industriak atzeratu egin dituela inbertsioak, ez bertan behera utzi. Aurten lehen bi hilabeteetako datuak ditugu, eta iazkoak baino hobeak dira»
LANDER ARTETXEElkargiko presidentea
Industriaren txakalaldia sektoreka aletzen jarrita, Artetxek autogintza nabarmendu du. Txanponaren beste aldean daude hegazkigintza, energia sektorea eta bioteknologia. «Enpresak dibertsifikatzen ari dira, eta horretan lagundu diezaieke Elkargik. Esaterako, duela gutxi guk lagundu dugun enpresa bat, autogintzarako plastikozko piezak ekoizten dituen enpresa bat, laborategi materiala egiten hasi da».
Elkargi elkar bermatzeko sozietate bat (EBS) da, enpresek sortua, eta, finantzaketaz gain, aholkularitza eta kudeaketa zerbitzuak ematen dizkie enpresa ertain eta txikiei. Iaz 415 milioi euro eman zituen mailegutan, eta %50 hirugarren sektorerako izan zen. «Hor nabarmentzekoa da ikus-entzunezko sektoreko enpresetan izan dugun gorakada», aipatu du Artetxek. 2019an %30eko kuota zuen; 2023an, %38koa. Sektoreka, eraikuntza da Elkargiren atea gehien jotzen duten sektoreetan hirugarrena. Iaz 51,9 milioi bideratu zituzten, guztiaren %12 —2023an %8 bideratu zuten eraikuntzara—.
Industriaren bilakaera kezkagarria Elkargiren egoeraren kontrako bidean doa, EBSak hazkunde nabarmena izan baitu azken bost urteetan: 2019an, 300 milioi euroren operazioak egin zituen; iaz, 415 milioikoak. «Gaur egun, 11.300 enpresari eskaintzen diegu finantzaketa. Enpresa txiki eta ertainen finantza erakundea izan nahi dugu, eta gure inpaktu soziala finantzaketa hutsa baino gehiago da». Azalpena Zenon Vazquez Elkargiren zuzendari nagusiak emana da.
Elkargik, izan ere, jauzia eman nahi du hurrengo hirurtekoan, hala jaso du behintzat 2025-2027 plan estrategikoan. Azken hiru urteetan 430 milioi eurotik gora finkatu du bere finantza jarduera, eta 500 milioiren langa igarotzeko asmoa du. Negozioaren bizkarrezurra Hego Euskal Herrian du, baina Madrilen ere badu bulego bat.
Aholkularitza indartu
Hazkunde bide horretan, Vazquezek nabarmendu du prestakuntza eta aholkularitza arloak sendotu nahi dituztela. Ohartu dira enpresa ertain eta txiki askori kosta egiten zaiela kanpoko aholkulariengana jotzea, eta laguntza behar izaten dutela erabaki batzuk hartzeko garaian. Nolako erabakiak? Vazquez: «Fusioak, burtsara irteteko aukera, edo inbertsio funtsen sarrerak. Edota eguneroko edozein» .
Fusioen arloan sakondu du zuzendari nagusiak, eta neurria jarri dio bere nahiari. «Guk ez dugu aholkurik emango Talgoren fusioan: gurekin lan egiten duten enpresak txiki eta ertainak dira, eta gehienak, familia arlokoak. Baina gurean halako erabakiak ez dira ohikoak; askotan, kulturarengatik. Beti pentsatu izan dugu gure enpresak balio duela gehien». Alde horretatik, eredu argigarri bat jarri du: «Enpresa bat etorri zaigu, esanez funts batek %51 erosi nahi duela eta ez duela ezer aldatuko hitzemanez. Horrelakoak aztertu egin behar dira».
8,4 milioi euroren irabaziak
Elkargik 23.000 bazkide ditu; gehien-gehienak, enpresa txiki eta ertainak. Hainbat bankuk ere ordezkaritza dute akziodunen artean. Enpresa guztiek bezala, bere emaitzen berri jakinarazi behar du, eta iaz 8,4 milioi euroren irabaziak izan zituen. 186 milioi euroren baliabide propioak ditu, eta kaudimen ratioa %16,6 du —Espainiako Bankuak EBSei eskatzen dien halako bi—. Berankortasun tasa, berriz, %1,87 du. Kopuru txikia da, enpresekin bakarrik jarduten duela kontuan hartuta.
