Imanol Pradales Eusko Jaurlaritzako lehendakariaren arabera, Europako industria eta ekonomia «berpizteko» bidean giltzarriak izango dira sektore aeronautikoa eta aeroespaziala. Eta hor euskal industriak badu «ikur bat», haren esanetan: ITP Aero. Hori «baliatu» behar dela azpimarratu du lehendakariak, euskal enpresen «lehiakortasuna eta etorkizuna» bermatu ahal izateko.
ITP Aerok Zamudioko (Bizkaia) teknologia parkean zabaldu duen fabrikazio aurreratuko lantegi berriaren inaugurazio ekitaldian egin ditu adierazpenok Pradalesek. Harekin batera, ekitaldian izan da Pedro Sanchez Espainiako presidentea ere, eta biek ala biek nabarmendu dute aeronautika enpresak duen garrantzia. Iritzi diote aeronautika enpresa estrategikoa dela Europako Batasunaren «defentsari eta ekonomiari» begira, are gehiago arlo militarraren aldeko apustua indartu nahi den honetan.
Izan ere, erakundeek argi dute ITP Aero bezalako enpresak «berme bat» direla Europaren interesak eta bere burujabetza ekonomikoa ziurtatzeko. Horregatik, teknologia eta ezagutza horri bertan eustearen alde egin nahi dute. Ez alferrik; Europako gerra hegazkin berriak eraikitzen ari diren enpresetako bat da ITP, eta hegazkinetako motorren belaunaldi berrietako osagaien fabrikazioan liderra da munduan.
Bere hitzaldian, Pradalesek azpimarratu du ITP Aero «funtsezkoa» dela Euskal Herriarentzat, industriari ez ezik gizarteari ere «hauspoa eta hegoak» ematen dizkiolako: besteak beste, kalitatezko enplegua eta aberastasuna sortzen dituelako; enpresa txiki eta ertainen negozioa bultzatzen laguntzen duelako; eta ikerketan eta garapenean inbertsioa sustatzen duelako, eta «eraldaketa digitalean eta ekologikoan aukera berriak bilatu». Zerbaitegatik erosi zuen Eusko Jaurlaritzak enpresa horretako akzioen %6, Finkatuz funtsaren bidez, 2022an.
Lehendakariak gogorarazi du Europak «apustu sendoa» egingo duela bere industria sarea babesteko, eta adierazi du etekin horrek euskal industriaraino heldu behar duela. «Atera diezaiogun etekina gure potentzial industrial eta zientifiko-teknologiko guztiari, gure etorkizuna jokoan dago eta».
Pradales eta sanchez, bilduta
Gaurko ekitaldian, Pradalesekin batera Pedro Sanchez Espainiako gobernuburua izan da, eta, ITPra bisita egin aurretik, harekin bildu da —ez dute zehaztu non—. Pradales lehendakari denetik, laugarrenez egon dira elkarrekin. Bi gobernuetako iturriek zabaldu dutenez, hizpide izan dituzte Europako industria plana, Donald Trump AEBetako gobernuburuak iragarritako muga zergei eman beharreko erantzuna eta Espainiako testuinguru ekonomikoa. Autogobernuaz ere hitz egin dutela adierazi dute.
«Errotutako» enpresa
ITP Aerok 24 milioi euro inbertitu ditu Zamudioko planta berrian. Admire izena jarri diote, Fabrikazio Aeroespazial Aurreratuko Zentroaren ingelesezko itzulpenetik eratorria. Han 150 langilek egingo dute lan, eta ikerketan eta garapenean jardungo dute. Zehazki, «konplexutasun handiko» piezak diseinatuko dituzte, aeoranutikaren «erronka berriei» erantzuteko.
Besteak beste hidrogenoa, gasolina eta elektrizitatea uztartzen dituzten motorrak diseinatuko dituzte. Gainera, adimen artifiziala txertatuko dute ekoizpen lerroetan, adibidez materialen bizitza baliagarria luzatzeko estrategiak garatzeko.
Eva Azoulay ITP Aero taldeko buruak azaldu duenez, ITP enpresa Euskal Herrian sortu zen, hemen errotuta dago, eta hala izango da aurrerantzean ere. «Lanean jarraituko dugu Euskadi eta Espainia industria aeronautiko globalean punta-puntako herrialde gisa bultzatzen segitzeko». Negozioari dagokionez, azaldu du hegazkin konpainia komertzialen partetik «etorkizuneko motorren» eskaera handia dagoela, eta, azkenengo urtean bezala, aurtengo aurreikuspenak ere onak direla, eta enpresak goraka segituko duela.
Bain Capitaleko ordezkari Ivano Sessak, berriz, ITP Aeroren «apustu irmoa» txalotu du. Hain justu, AEBetako inbertsio funts hori da ITPren inbertsore nagusia gaur egun (%76,5). «ITP Aeroren hazkundea nabarmentzekoa da, eta erritmo honetan laster izango da sektoreko enpresarik handienetakoa. Abiazio komertzialaren dinamismoa kapitalizatzea lortu du, eta ziur gaude merkatu honen buru izango dela aurrerantzean ere», azpimarratu du Bain Capitaleko kideak.
Abiazio komertziala ITP Aeroren negozioaren %70 da gaur egun, baina arlo militarrean ere bezero ugari ditu. Konpainiak emandako datuen arabera, mundu osoan ekoizten diren hegazkinentzako motorren %40k ITP Aeroren teknologiaren bat daramate. Pradales lehendakariak nabarmendu duen moduan, «ITP Aeroren motorren bat duten sei aireratze egiten dira munduan minutuero».
