Presidente berria du Innobasque Berrikuntzaren Euskal Agentziak: Imanol Rego, Irizar taldeko zuzendari nagusia (Donostia, 1972). Kargu hori izango duen bosgarren pertsona da, eta Imanol Salaberriaren lekukoa hartu du; hura izan da agentziako presidentea 2017tik.
Gaur goizean ezohiko batzarra egin dute Zamudioko parke teknologikoan (Bizkaia), eta han eman dute berria. Bertan izan dira Eusko Jaurlaritzako Mikel Jauregi Industria sailburua eta Juan Ignacio Perez Iglesias Zientzia, Unibertsitate eta Berrikuntza sailburua, Innobasqueren zuzendaritza batzordea osatzen duten 60 lagunekin batera.
Kargua hartu berritan, Regok nabarmendu du Salaberriaren aroan finkatu egin dela Innobasqueren ikuspegia, hau da, «berrikuntzaren euskal ekosistemaren bidez Euskadik Europan berrikuntzaren lider diren eskualdeen ligan jokatzea». Gehitu du inflexio puntu batean daudela orain: «Gure enpresaren eta industria ehunaren jasangarritasuna bermatzeko, beharrezkoa izango da ikuspegi estrategikoa izatea, baita etengabe aldatzen ari den munduan talentua erakartzeko eta fidelizatzeko gaitasuna izatea ere».
Rego 2022ko irailetik da Innobasqueren zuzendaritza batzordeko kide, Irizar taldeko zuzendari nagusi izendatu zutenetik. Industria ingeniaria da, aurrez Irizar E-mobilityren buru izan zen, eta Schneider Electric konpainian ere kargu garrantzitsuak izan zituen. Gaur egun, Tecnaliako eta Cideteceko patronatuetako kide da, eta Nafarroako Unibertsitateko Ingeniaritza Eskolako kontseilukoa ere bai.
