Gaztempresa fundazioak 5,175 milioi euroren finantzaketa eman zien iaz enpresa berriei. Guztira 211 eratu ziren diru horren laguntzarekin, aurreko urtean baino %14,6 gehiago. Bizkaian 78 enpresa sortu ziren (153 lanpostu), 66 Araban (127 lanpostu), 41 Gipuzkoan (66 lanpostu) eta 28 Nafarroan (43 lanpostu). Ekintzaileen erdiak emakumezkoak ziren, batez beste 36 urte zituzten eta %55 langabezian zeuden enpresak sortzea erabaki zutenean. Enpresa gehienak hirugarren sektorekoak ziren (%33 merkataritzakoak eta %63 gainontzeko zerbitzuetakoak).
Iaz 389 lanpostu berri sortzen lagundu zuen Gaztempresa fundazioak, eta aurten 440era heltzeko asmoa dutela azaldu dute Xabier Egibar fundazioko arduradunak eta Juan Maria Aburto Enplegu eta Gizarte Politiketako sailburuak, Bilbon. Eusko Jaurlaritzak 215.000 euroko laguntza ekonomikoa emango du bi erakundeon arteko elkarlanaren barruan. "Gaur egungo Eusko Jaurlaritzarentzat lehentasunezko helburu bat da gazteen lehiakortasuna handitzea eta enplegua lor dezaten erraztea", azaldu du Aburtok. "Gure ustez, balio ekintzaileak sustatzen dituen kultura bat eta enpresa berriak sortzeko orduan arrakasta lortzen laguntzen duen trebakuntza bat garatzea da gure jardunaren zutabeetako bat", nabarmendu du.
Azken hamar urteotan, Gaztempresaren finantzaketari esker 1.984 enpresa eta 3.632 lanpostu sortu dira Araban, Bizkaian eta Gipuzkoan.
