Istripu larri bat izan zen igandean Funesko Bodega Romana industrialdean (Nafarroa). Elaborados Naturales de la Ribera elikagai lantegian lanean ari zela, makina batek 29 urteko langile baten besoa harrapatu zuen, eta oso zauri larriak eragin zizkion. Helikopteroz eraman zuten Nafarroako Unibertsitatea Klinikara, Iruñera, baina gauean hil zela jakinarazi du Foruzaingoak.
LAB sindikatuak bere webgunean duen zenbaketaren arabera, aurten Euskal Herrian lanean ari zela hildako 45. langilea da Funesen istripua izandakoa, eta Nafarroako hamahirugarrena.
Zenbaketa horretan agertzen dira istripuz ez ezik modu ez-traumatikoan hildakoak ere. Horietakoa zen azken-aurrekoa, C.F.M.D., 63 urtekoa, Bilboko aseguru etxe batean lanean ari zela zendutakoa irailaren 30ean.
Lau egun lehenago, bi kamioik elkar jo zuten N-134 eta NA-123 errepideak elkartzen diren tokian, Lodosako lurretan (Nafarroa). Talkaren ondorioz, garraiolari bat hil zen. 54 urte zituen, eta Errenteriakoa zen (Gipuzkoa).
