Nor bere bidetik, konforme. Sindikatu gehienek bananduta baina eskaeretan bat eginda ospatuko dute bihar langileen eguna. Prekaritatearen, soldata apalen eta lan baldintza kaxkarren aurka oihukatuko dute kaleetan. Erabakiguneak galtzea eta «industria politikarik eza» arbuiatuko dute, ozen.
ELA
Sindikatuen garrantzia
Ohi duen bezala, Bilbora eta Iruñera joko du ELAk Maiatzaren Lehenean, Gehiago balio dugu leloarekin. Adolfo Txiki Muñoz idazkari nagusiaren mitinak emango dio hasiera Bizkaiko hiriburuko mobilizazioari, 11:45ean, Jesusen Bihotza plazan. Jarraian, manifestazioa egingo dute Plaza Biribileraino. Iruñeko martxari, berriz, 11:30ean ekingo diote, Gurutzeko plazatik Udaletxe plazaraino. Sindikatuen garrantzia aldarrikatuko du Euskal Herriko sindikatu nagusiak: «Argi dugu langile klase antolatua dela indarra ematen diguna». Erabakigunei eustearen «premia» ere azpimarratuko du.
LAB
Independentzia ardatz
«Benetako alternatiba subiranista eta men egiten ez duena» eraikitzeko bidean, hainbat protesta antolatu ditu LABek Euskal Herri osoan, Langileok martxan, eskubideak aktibatuz! lemapean. Donostia, Gasteiz, Baiona eta Iruñeko eguerdiko mobilizazioez gain, altzairuaren krisiak gehien zigortutako herrietan manifestatuko da: Zumarragan (12:00), Sestaon (12:30) eta Amurrion (12:00). Nafarroan ere berebiziko indarra jarriko du. Tuterak, Tafallak, Altsasuk, Agoitzek, Doneztebek, Lizarrak, Zangozak, Oionek, Eibarrek, Donibane Lohizunek edota Maulek hartuko dituzte eredu aldaketa baten aldeko protestak.
CCOO ETA UGT
Negoziazio kolektiboari so
Urteotako ohiturari eutsi, eta elkarrekin irtengo dira kalera Hego Euskal Herriko lau hiriburuetan, Soldata txikien eta pobreziaren aurka lelopean. 11:30ean hasiko da Bilboko martxa, Kale Nagusitik; 12:00etan Gasteizkoa, Andre Maria Zuriaren plazatik; Donostiakoa, Alderdi Ederretik; eta Iruñekoa autobus geltoki zaharretik. CCOO eta UGT kexu dira austeritate neurriek ez dutelako lagundu krisia gainditzen, kontrakoa baizik: «Hazkunde motela, enplegu urria eta prekarioa baino ez dute ekarri». Negoziazio kolektiboa dute aberastasuna birbanatzeko bide egokitzat, eta sektoreko itunak eskatuko dituzte. Langabezia saria hiru urtera luzatu nahi dute.
STEILAS, ESK, CGT ETA CNT
Eskubideak berreskuratzea
Hegoaldean ordezkaritza txikiagoa duten sindikatuek elkartuta ospatuko dute Maiatzaren Lehena. Steilas, ESK, CGT eta CNT sindikatuek protesta bateratua egingo dute Bilbon, 11:30ean, Kale Nagusitik abiatuz. DesprekarizaTU! leloa hautatu dute. LSBk ere ordu eta toki berean hasiko du martxa, bere kasa. Estualdi ekonomikoaren ostean, langileen eskubideak indartzeko exijituko du Zure eguna, zure eskubideak leloarekin.
CGT, SOLIDAIRES, FSU ETA FO
Lan kodearen aurka, kalera
Baionan, Hendaian eta Maulen egingo dituzte Frantziako lan kodearen erreforma salatzea ardatz edukiko duten manifestazioak. Sindikatuak ez diren beste talde batzuek ere protestara deitu dute biharko, tartean Bizi elkarteak. 10:30ean Baionako tren geltokitik hasita, kexua eta umorea uztartuko ditu, «Valls, Hollande eta Macronen politikak sostengatzeko» egingo duen aberatsen manifan.
