Grebalari gehiago Bizkaiko metalgintzan

ELAk, CCOOk, LABek eta UGTk deituta, milaka lagun elkartu ziren BECen aurrean atzo. Sindikatuek ziurtatu dutenez, Bizkaiko metalgintzako grebaren bigarren egunean parte hartzea «%85 ingurukoa» izan da. Aurrekoan, maiatzaren 23an, enpresen %70-80 artean izan zen lanuztea, baina FVEM patronalak %26ra jaitsi zuen parte hartzea. Grebak gaur jarraituko du, eta sindikatuek manifestazio bat egingo dute Bilbo erdialdean. Atzo, berriz, Barakaldoko BEC erakustazokan batu ziren grebalariak, +Industry azokaren azken eguna egiten ari zirela. Lan ituna berritzeko negoziazioek ez atzera ez aurrera jarraitzen dute sektorean. Hogei bider elkartu dira alde biak, baina ez da ezer lortu.