MHP Europako oilasko ekoizle handienak Espainiako Gobernuaren baimena jaso du Uvesa erosteko enkantean sartzeko. Atzerriko Inbertsioen Espainiako Batzordeak haren eskaintza aztertu du, eta akziodunengana joateko baimena eman dio. Haren oniritzia ezinbestekoa zen, operazioak blokeatzeko ahalmena baitu; hala gertatu zen, esaterako, iazko abuztuan Magyar Vagon Hungariako tren ekoizlea Talgo erosten saiatu zenean.
Zabaldu dutenez, MHP 360 milioi euroko eskaintza prestatzen ari da enpresaren akzioen erdiak baino gehiago erosteko. Indartsu sartu da enkantean, egun Uvesaren kontrola hartzeko lehia enkantea baita. Interesa duten beste bi enpresak Fuertes Espainiako taldea eta Lusiaves Portugalgoa dira. Hirurak haragi multinazional handiak dira. Akziodunek batzar orokorrean erabakiko dute zein onartu; martxoaren 31 baino lehen egingo dute.
Nor da nor?
MHPk gaur jaso du baimena, eta erabakiaren berri emateko oharrean tonu oso baikorra erabili du, eta Uvesako inbertsioa pauso estrategikoa dela nabarmendu. MHPk Iberiar penintsulako merkatuan sartzeko aukera ikusten du Uvesarekin. MHP egoitza Zipren duen Ukrainako enpresa erraldoi bat da —360.000 hektarea dauzka Ukrainan landatuta—. 32.000 langile ditu guztira, eta 2023an 2.720 milioi euro fakturatu zituen.
Eta nor da Uvesa euskal ekonomian? Bada, Nafarroan gehien fakturatzen duten enpresetan bosgarrena da. Oilasko eta zerri haragia eta pentsuak ekoizten ditu. Lau planta ditu, hiru Espainian eta bat Tuteran; azken hori da egoitza nagusia. 2023an 625 milioi euroren fakturazioa izan zuen eta 29 milioiko irabaziak. Ia 2.000 langile ditu guztira, baina auzibide luze batean sartuta dago Espainiako lan ikuskaritzarekin. 500 autonomo faltsurekin lan egitea egotzi zion, eta auziaren azken ebazpena erabakitzeko dago.
