Ofiziala da, Eskubide Sozialen Europako Batzordeak (ESEB) arrazoia eman dio UGTri, eta ebatzi du langileari «kalte ordain egokia» jasotzeko eskubidea urratu egiten zaionez, Espainiak ez duela betetzen Europako Gutun Soziala. «Europako Gutunaren 24.b artikulua urratu da», ondorioztatu du Estrasburgon egoitza duen batzordeak, aldeko hamahiru botorekin eta kontrako batekin.
Sindikatuak salatu duenez, langileak, legez, kalte ordain automatikoa jasotzeko eskubidea du «soilik». Kalte ordain horrek gehienezko muga bat du —lan egindako urte bakoitzeko 33 egunekoa eta gehienez 24 hilekokoa (betiere enpresaburuak langilea berriz kontratatzea aukeratzen ez badu)—, eta, beraz, «ez du kontuan hartzen jasandako benetako kaltea». Hori gertatzen da, adibidez, langileak oso tarte txikia egin badu enpleguan.
UGTk elkarrizketa sozialerako deia egin dio gobernuari, Espainiako legedia ebazpen horretara egokitzeko, joan den astean bigarren lehendakariorde Yolanda Diazek hitzeman zuen moduan. Hortaz, sindikatuak honako hauek eskatzen ditu: kalte ordain osoa finkatzea, konpentsazio mugak ezabatzea edo handitzea, lanera itzultzea sustatzea, tramitazio soldatak sartzea eta tramite judizial azkarragoa ziurtatzea.
