Basqueland Gipuzkoako garagardoak merkatu berrietara egingo du jauzi. Estrella Galiciak ekoiztetxearen parte bat erosi du, eta, ondorioz, atzerriko merkatuetan presentzia handiagoa izango du. Gaur sinatu dute akordioa, Hernanin, eta Basquelandeko arduradunak «harro» agertu dira. Salerosketaren xehetasunik ez dute argitara atera.
Basqueland eta Estrella Galicia jatorri ezberdineko garagardoak izan arren, helburu bera dutela azpimarratu dute: «aparteko kalitateko garagardoa ekoiztea». Halere, Francisco Ucha Hijos de Rivera konpainiako zuzendari nagusiaren arabera, «oraindik gutxi dira Espainian Basqueland ezagutzen duten edo garagardo artisau honen kalitatea probatu duten garagardo kontsumitzaileak», eta hori aldatu nahi dute: «Basquelanden irismena zabaldu nahi dugu».
Ignacio Rivera Hijos de Riverako presidente exekutiboak adierazi du operazioarekin eurak ere irabazle suertatu direla. «Aurrerapauso garrantzitsu bat eman dugu craft garagardoak ekoizteko bidean. Basquelandek primeran egiten du bat defendatzen ditugun artisau balioekin, eta ingurunean benetako eragin positiboa sortzearekin konprometitutako ikuspegi bat partekatzen du gurekin».
Hijos de Rivera Galiziako ekoiztetxe bat da. Zenbait edari alkoholdun ekoizten ditu; tartean, garagardoak. Besteak beste, Estrella Galicia eta 1906 marken jabeak dira.
Gora, aparra bezala
Basqueland duela hamar urte Hernanin sortutako garagardo ekoizlea da. Etengabeko hazkundea izan dute, eta iaz 3,5 milioi euro fakturatu zituzten; beste era batera esanda, 800.000 litro garagardo ekoitzi zituzten. 30 bat langile ditu. Basque Beer kolektiboko kide da Basqueland.
Sinadura ekitaldian izan da Kevin Patricio, markaren sortzaileetako bat eta zuzendari nagusia. Kontatu du artisau garagardoak hazkunde handia izan zuela pandemiaren aurretik, baina bilakaera eten egin zen orduan, eta sektoreak ezegonkortu egin da. «Azkar egokitu ginen bezeroen bizimoduari, prezio, estilo eta zapore aldetik egokitzen zitzaizkion garagardoak egiteko. Basqueland eguneroko sari horietako bat da, luxu merke bat».
