Epaiaren zain geratu da azkenik 'Hiriko kasua'

GASTEIZ. «Inoizko kudeaketarik txarrena izan duen proiektuetako bat». Esaldi horrekin laburbildu zuen fiskalak Hiriko ibilgailu elektrikoa proiektuaren porrota aztertzeko azken saioan. Ondorioak aurkezteko hamabost minutuko hitzaldian, diru publikoa «xahutzea» egotzi zien fiskalak akusatuei. Estatuaren abokatuak bat egin zuen, eta enpresaren kudeaketa txarra «frogatutzat» jo zuen. Ia 19 milioi euro irentsi zituen Hirikok laguntza publikoetan, eta diru horretatik gehiena bueltatzeko eskaerari eutsi diote akusazioek ondorioen aurkezpenean.

Ezohiko luzera izan du epaiketak. Bi hilabete eta erdi iraun du, eta 40 lagun baino gehiago pasatu dira aretotik, akusatuak, lekukoak eta perituak aintzat hartuta. Defentsaren abokatuek gogor jo zuten fiskaltzaren aurka, eta auzian «instrukzio ezkutua» egin nahi izatea egotzi zioten, kereila penalean pentsatuta. Lekukotzak entzunda ezin zaiela akusatuei porrota egotzi argudiatu zuen abokatuetako batek. «Kudeaketa txarra ez da erruduntasuna», ziurtatu zuen.