Novaltia eta Vulcanizados Zuloaga enpresetako langileek elkarretaratzea egin dute gaur goizean, Lan Ikuskaritzaren Bilboko egoitzaren atarian. Enpresa biek grebalarien greba eskubidea «etengabe» urratzen dutela adierazi dute, eta jarrera horrekiko Lan Ikuskaritza «konplize» dela gehitu dute. Novaltiako (Zaratamo, Bizkaia) langileek 1.297 egun daramatzate greban, eta Vulcanizados Zuloagakoek (Zaratamo, Bizkaia), berriz, 587.
ELA sindikatuaren arabera, epaitegiek ere Lan Ikuskaritzaren praxi txarra aitortu dute Novaltiaren kasuan. Bestalde, ELAk dio Vulcanizados Zuloagako langile batzordeak joan den udan premiazko salaketa bat jarri zuela enpresaren aurka, eta inspektoreak oraindik ez dira enpresara joan salatutako gertakariak egiaztatzera; salaketa jarri zutenetik hona, ikuskaritzak ez du txostenik argitaratu. Gertakari horiek direla-eta salatu du sindikatuak ikuskaritzaren «konplizitatea», eta langileei «bizkarra ematea» ere egotzi diote.
