Emisio gutxiko autoak erosteko Jaurlaritzaren diru laguntzak gaur sartu dira indarrean

Bost milioi euroko aurrekontua izango du planak, eta elektrikoak lehenetsiko ditu, baina diesel eta gasolina autoak ere sartuko dira. 3.500 eurora artekoak izango dira laguntzak, autoaren arabera.

Auto saltokiak, Bilboko kanpoaldean. LUIS TEJIDO / EFE
Auto saltokiak, Bilboko kanpoaldean. LUIS TEJIDO / EFE
Imanol Magro Eizmendi.
2025eko apirilaren 1a
09:00
Entzun 00:00:0000:00:00

Gaur sartu da indarrean emisio gutxiko autoak erosteko Eusko Jaurlaritzaren plana. 3.500 eurora arteko diru laguntzak emango ditu, eta interesa duenak Energiaren Euskal Erakundearen webgunean egin behar du eskaera. Zenbait motatako auto elektrikoak erosteko laguntza da, baina baita gutxien kutsatzen duten diesel eta hibridoak erostekoa ere. Auto berria erosi ondoren jasoko du laguntza erosleak, eta ezinbestekoa da beste auto bat txatarretara botatzea.

Planak bost milioi euroko aurrekontua du, baina, eskari gehiago egonez gero, handitzeko aukera egongo da. Jaurlaritzak 2.000 ibilgailu ordezkatzea espero du, aurreko aldietako Renove planetan ere antzeko kopurua ordezkatzea lortu baitzuen. Halaber, zehaztu du laguntzak bateragarriak direla Espainiako Gobernuak ematen dituenekin. Madrilek 7.000 eurorainoko laguntzak ematen zituen auto elektrikoak erosteko. Plana etenda dago, ordea, Espainiako Kongresuak ez zuelako onartu hura luzatzea jasotzen zuen omnibus legea.

Hona hemen diru laguntza lortzeko jakin beharrekoak:

1

Zer motatako autoak eros daitezke laguntzarekin?

Laguntzak motor mota guztietarako izango dira, baina baldintza hau bete beharko da: auto berriak kilometroko 125 gramo CO2 baino gutxiago isurtzea; furgonetek, kilometroko 150 gramo baino gutxiago. Baldintza horiek betetzen dituzten konbustiozko 900 modelo daude merkatuan, eta gehienak hirugarren gamatik beherakoak dira: Volkswagen Golf, Seat Leon, Audi A3... Gehienezko prezio bat ere ezarriko dute: 40.000 euro auto elektrikoa erosiz gero, eta 75.000 euro, hidrogenozkoa erosiz gero.

2

Zer obligazio bete behar ditu erosleak?

Auto bat txatarretara bota behar du erosleak, eta ibilgailu horrek bi baldintza hauetako bat bete behar du gutxienez: batetik, autoak 20 urte edo gehiago izatea; eta, bestetik, autoa bada, kilometroko 175 gramo baino gehiago isurtzea eta, furgoneta bada, kilometroko 200 gramo baino gehiago isurtzea.

3

Zenbatekoak dira laguntzak?

Asko jota, auto berriaren prezioaren %20ko laguntza emango da; 3.500 euro, gehienez ere. Auto berriak erosteko gehienezko prezio bat ere ezarri dute: 40.000 euro auto elektrikoa erosiz gero, eta 75.000 euro, hidrogenozkoa erosiz gero. BEZa eta matrikulazio kostuak ez dira sartzen.

4

Mugarik ba al da?

Bai, pertsonako auto bakarra eros daiteke, eta enpresako, hiru. Beste diru laguntza batzuekin bateragarria da, betiere guztiak elkartuta autoaren prezioaren %70etik beherakoak badira. Erosleak Araban, Bizkaian edo Gipuzkoan erroldatua egon behar du, eta erosketa lurralde horietan egin beharra dauka.

5

Noiz arte eska daitezke laguntzak?

Laguntzak eskatzeko epea gaur ireki da, eta irailaren 15era arte egongo da zabalik, betiere bost milioiak ez badira lehenago agortzen. Eskaintzak banan-banan aztertuko dira, eta autoa erosi ondoren emango dira laguntzak.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Kazetaritza propio eta independentearen alde, 2025 amaierarako 3.000 irakurleren babes ekonomikoa behar du BERRIAk.