ELB sindikatuak deiturik, hogei bat laborari Ezpeize-Ündüreineko Pierette etxaldera joan dira goizean (Zuberoa), erremorkak belar biribilez beterik. Urtarrilean behi baten azterketetan agertu tuberkulosia batengatik, administrazioak ez ditu utzi Sophie eta Philippe Sicre etxaldeburuak behi saldoa borturat igortzen uda honetan. «Laguntzarik gabe, laster hasi beharko dituzte heldu den neguko erreserbak», salatu du ELB sindikatuak. Bortuko bazketara joanez, ez da halakorik gertatzen. Ondorioz, elkartasunez, ELBko laborariek haien uztako belarretik ekarri diete Pierette etxaldekoei, negua iragan dezaten lasaiago.
Joan den martxoaren 30ean, jada, ELBek deiturik, 400 lagun elkartu ziren, Pierette etxaldean administrazioak behi saldo guzia hil nahi zuelako, eta egiten ez uzteko. Hiltzerik ez zen gertatu, eta administrazioak beste proposamen bat egin zion Ezpeize-Ündüreingo etxaldeari. Behiak etxaldean atxiki behar izan dituzte, ondorioz. Behiak borturat ezin igorriz, laster udako belar ematen hasi beharko dute behien bazkatzeko, neguko erresalbuak murriztuz. Horregatik, ELBek elkartasuna erakutsi nahi izan die.
Laborari sindikatuak aspalditik salatua du administrazioak «gardentasun falta» duela behien tuberkulosiaren osasun zaintzan. Ez dira ados kasu bat agertu orduko saldo guzia hiltzeko manuarekin. Arrangura dira ezen behizain batzuek tropa hilik ukan ondoan ez baitute berriz osatu saldo berria. Ofizioaren etorkizunarentzat kezkagarri zaiei laborariei.
