Ehun bat laborari bildu dira goizean, Oloroeko (Biarno) prefeturaren aitzinean, Zuberoan bigarren profilaxia ezartzen duen dekretua atzera bota dezatela galdegiteko. ELBk deitu zuen elkarretaratzera: prefeturako ordezkariekin bildu nahi dute protokoloa bertan behera gelditu dadin.
Joan den martxoaren 17an iragarri zuten behien tuberkulosia zaintzeko plantatu duten protokoloa: transhumantzia erregulatzea baldintzatzen du, bigarren profilaxia bat ezarriz Zuberoako baserrietan. Hain zuzen ere, tuberkulosia duten hainbat behi saldoz ohartu ziren Zuberoan, joan den urte hondarrean. Bistan da: hazleek saldo osoak hiltzea saihestu nahi dute, eta erresistentzian dira geroztik.
Erraterako, behien tuberkulosia atzemateko testen fidagarritasuna ere kritikatu dute, horrek berak baitu baldintzatzen zenbat behi hilko dituzten gero: «Behien hiltzeko erabiltzen duten dirua ikerketan ezar dezatela», salatu du Beñat Etxeto ELBko laborariak.
