Garraio publikorako laguntzez eta hainbat salgairen BEZaz gain, bazegoen beste neurri bat Espainiako Gobernuak argitu behar zuena urtea amaitu aurretik; ea jarraitu behar zuen bankuen eta energia konpainien ezohiko irabazien gaineko zerga bereziekin.
Teresa Ribera Trantsizio Ekologikoko ministroak aurreratua zuen zerga hori moldatzearen aldekoa zela gobernua. Adierazpen horietan zerikusirik izango zuen EAJren eskaera batek ere, Pedro Sanchezen inbestidurarako negoziazioetan alderdiak hizpide hartu baitzuen bankuen eta bereziki energia konpainien gaineko zerga.
Jeltzaleentzat garrantzitsua da gaia, Iberdrola eta Petronorrengatik, eta Kutxabankengatik ere bai. Eta, hain zuzen, Petronorrek eta haren jabe Repsolek —Josu Jon Imazek— EAJren tekla, haren Kongresuko diputatuen giltza, baliatu zuten zergaren aurka egiteko.
Orain iritsi da negoziazio horien emaitza: EAJ eta Sanchezen gobernua ados jarri dira. Gaurko ministroen kontseiluak erabakiko du energia konpainien eta bankuen gaineko zerga horrekin jarraitzea, baina «trantsizio ekologikorako inbertsio estrategikoetarako» pizgarri baten bidez arinduko da.
Horrez gain, bi zergak itundu egingo dira, Kontzertu Ekonomikoa eta Nafarroako Hitzarmena moldatuta.
Errelebo kontratua
Bestalde, jeltzaleen eta Sanchezen gobernuaren artean adostu dute 2024. urtera luzatzea errelebo kontratua industria sektorean, langile taldeak gaztetzea xedetzat hartuta.
EAJ ez da Sanchezekin ados jartzea lortu duen alderdi bakarra, neurri jakin batzuk moldatu edo luzatzeko. EH Bilduk atzo jakinarazi zuen pertsona zaurgarriak etxegabetzeko debekua 2025. urtera arte luzatzea hitzartu duela Madrilekin.
