Hego Euskal Herriko portuek urte hasiera oso ezberdina izan dute. Bilboko portuaren trafikoa %9,7 handitu da lehen sei hilabeteetan; Pasaiakoak, berriz, %8 egin du behera. Bilboko portuaren hazkundearen arrazoia salgai likidoak dira —iaz baino %15,9 gehiago—. Pasaiari, aldiz, kalte handia egin dio salgai solidoen jaitsierak (%24).
Bilboko portuan hemezortzi milioi tona mugitu dira lehen sei hilabeteetan, Pasaiakoan, berriz, 1,6 milioi tona. Ohikoa denez, Bilbon salgai likidoak izan ziren salgaien gehiengoa: 11,7 milioi tona. Haien ugaritzea deigarria izan da, iaz tarte berean 10,1 tona mugitu zituztelako. Salgai likido horiek, normalean, fintzeko petrolioa eta gas likidotua izan ohi dira.
Salgai likidoen trafikoak %15,9 egin du gora Bilbon. Normalean, fintzeko petrolioa eta gas likidotua izan ohi dira
Salgai solidoak %2,3 gutxitu dira, iazko datuekin alderatuta. Alde horretatik, deigarria da salgai horiek ekainean izan duten beherakada: iazko ekainean 382.000 tona mugitu ziren, eta aurten 282.000 (%26,1). Ro-ro garraioa, berriz —autoak eta kamioien atoiak eramaten dituzten ferryak—, %11,3 ugaritu da. Hor sumatu da linea berriek zer eragin izan duten.
Edukiontziak portuaren orbana dira, oraindik ere. Edukiontzi garraioak behera egin baitu, hala merkantziaren pisuan (-%5,1) nola edukiontzi kopuruan (-%10). Urteak dira kopuru hori altxatu ezinda dabilela.
Gurutzaontziei dagokienez, 35ek ukitu dute portua, iaz baino batek gehiagok, baina %10,2 ugaritu dira bidaiariak: 96.000 izan ziren iaz, eta 106.000 aurten.
Pasaia, pattal
Pasaian, zenbakiak okerragoak dira. Besteak beste, bertan ez dagoelako salgai likidorik mugitzen. Salgai orokorren mugimenduak %1,2 egin zuen gora, baina solidoenak %24 egin zuen behera. Ro-ro-ari dagokionez, %8,9 egin zuen behera. Azpiatal horretan, salmentarako auto garraioa garrantzitsua da Pasaian, eta %8,5 gutxiago mugitu ziren. Iazko lehen sei hilabeteetan 141.859 auto mugitu zituzten; aurten, 129.846.
