Bi eroriko eta bi heriotza. Lanera joan eta etxera itzuliko ez diren bi behargin gehituko dira gaur laneko heriotzen zerrendara.
Loiuko Larrondo kalean gertatu da ezbeharretako bat, Bizkaian. Eusko Jaurlaritzako Segurtasun Sailak jakinarazi duenez, 47 urteko gizonezko bat hil da 11:10ean, pabiloi baten teilatutik erorita. Bertaratu diren larrialdi zerbitzuek beharginaren heriotza ziurtatzera mugatu behar izan dute.
Zortzi metrotik erorita
Beste behargin bat ere hil da gaur goizean, Olleta kontzejuan, Leozen (Nafarroa). Lergako Bidea izeneko pistan gertatu da ezbeharra, 11:30ean; 28 urteko gizonezkoa telefono zutoin batean ari zen beharrean, eta, argitu gabeko nondik norakoengatik, zortzi bat metrotik erori, eta bertan hil da.
SOS Nafarroak azaldu duenez, Tafallako suhiltzaileak, anbulantzia bat, helikoptero medikalizatua eta foruzainak bertaratu dira istripuaren gunera, baina larrialdi zerbitzuek ezin izan dute ezer egin behargina salbatzeko.
Foruzaingoa hasia da ezbeharraren arrazoiak eta nondik norakoak ikertzen.
LAB sindikatuaren kontaketaren arabera, lanean ari zirela Euskal Herrian hiltzen diren 46. eta 47. beharginak dira. Gaurkoen aurreko laneko heriotza ere Nafarroan jazo zen, hilaren 7an: Funesen 29 urteko behargin bat hil zen, bezperan Benin Foods enpresan makina batean harrapatua gelditu ostean.
