Hiru arrantzale zihoazen itsasontzi bat hondartu egin da ordu txikietan Ziburun (Lapurdi), Zokoko diketik gertu, eta horietako biren bila aritu dira uretan. 30 urte zituen arrantzaleetako batek, eta 58 urte besteak. Beste bat ere bazihoan ontzian haiekin, 37 urteko gizon bat, ontziko kapitaina; hipotermiak jota atera dute uretatik, eta Baionako ospitalera eraman dute.
Zokoako itsasbazterrean segitzen dute larrialdi zerbitzuek. Galdu diren bi arrantzaleen xerka segitzen dute helikopteroarekin.
— Euskal Irratiak (@euskalirratiak) December 22, 2023
Jada 5 oren baino gehiago daramate galdurik ur hotzetan.#Ziburu#Istripuapic.twitter.com/lXClHTwWji
02:30 inguruan izan da ezbeharra. Ciycnos itsasontzia Ziburuko arrain enkantera zihoan, baina 200 bat metro desbideratu eta, Zokoko dikea jo, eta hondoratu egin da. Arcachondik atera zen itsasontzia, eta Donibane Lohizune zuen helmuga.
Larrialdi zerbitzuek erreskate operazio bat jarri dute martxan berehala, eta bilaketa lanetan aritu dira bi dozena suhiltzaile, bi helikoptero eta erreskate ontzi bat, gutxienez.
Ciycnos itsasontzia Ziburuko arrain enkantera zihoalarik, 200 metroz tronpatu da norabidez eta Zokoako dikea jo du.
— Euskal Irratiak (@euskalirratiak) December 22, 2023
Desagertu diren 30 eta 58 urteko arrantzaleak senegaldarrak dira, eta salbatua izan den 40 urteko gizona, ontziko patroia da. pic.twitter.com/cPYDjTvaCA
Giro gogorrak eraginda, salbamendu lanak «konplikatuak eta gogorrak» direla nabarmendu du Eneko Aldana-Douat Ziburuko alkateak Euskadi Irratian, eta Atlantikoko itsas prefeturak 13:40 aldera utzi ditu bilaketa lanak bertan behera. Itsasoko uraren tenperatura hamabi gradukoa zen, eta marinelak bizirik aurkitzeko itxaropena erabat galdua zuten ordurako.
Ez dago argi ezbeharra zerk eragin duen, baina litekeena da nabigazio arazoengatik gertatu izana. Aldana-Douaten esanetan, dena den, «hipotesi ugari» daude, eta istripuaren nondik norakoak argitzeko ikerketa zabalik dago.
Lan istripua
LAB sindikatuak lan istriputzat jo du arrantza ontziaren hondoratzea, eta desagertutako bi arrantzaleak lanean hil diren langileen zerrendan sartu ditu. Sindikatuaren kontaketaren arabera, 58 lagun hil dira aurten Euskal Herrian lan istripuen ondorioz.
Sindikatuak adierazi du arrantza sektoreak lan baldintza gogorrak dituela berariaz, baina gogorarazi du Gabon garai hauetan bereziki lan karga handiak izaten dituztela arrantzaleek. Horrek eragiten duen «presioa» gaitzetsi du LABek: «Lan baldintzak oso gogorrak dira, goizaldeko lana, lan ordu luzeak eta ia deskantsurik gabeko jardunaldiak tarteko, eta arrazoi horiek aurkitzen dira halako istripu iturburuan».
