Arabako plantak «arriskuan» daude, Tubacexen ustez

AMURRIO. Tubacexeko zuzendaritzak «arriskuan» ikusten du Arabako planten etorkizuna. Langileei bidalitako barne ohar batean, grebari egozten dio egoera larri hori —216. eguna gaur—, eta protestaldia mantentzeko arrazoirik ez dagoela iritzi dio. Enpresak, berriz, berretsi du ez dagoela prest egin asmo dituen 129 kaleratzeen indargabetzeari jarritako helegitea kentzeko. Alde horretatik, gogoratu du kaleratzeak saihesteko eginiko eskaintza ez dela berria eta aurretik esana zuela langileek murrizketa «estrukturalak» onartzen bazituzten eragotz zitezkeela. Sindikatuek ere esana zuten hori, baina haiek azaldu dute epaileen arabera ez dagoela horrelako neurririk hartzeko arrazoirik. Era berean, salatu dute Tubacex Austriako beste planta batera desbideratzen ari dela Araban egiten ziren lanetako batzuk.