Arabako ostalaritza sektoreko negoziazio mahaia hilabete barru elkartuko da, abenduaren 14an. Ia urtebete da hitzarmenaren negoziazioa blokeatuta dagoela, eta are atzeragotik daude soldatak izoztuta. 2019an eguneratu ziren azkenekoz. Bada, hurrengo bileraren atariko gisa, ELA, UGT eta CCOO sindikatuek Arabako ostalariak grebara deitu dituzte abenduaren 5erako eta 7rako.
Sindikatuek exijitzen dute erosteko ahalmena berreskuratzea KPIari lotutako soldata igoerekin, lanaldiak «nabarmen» murriztea, eta banatzaileentzat eta pisuko zerbitzarientzat «neurri zehatzak» hartzea.
LABek ez du bat egin deialdiarekin, «gainerako sindikatuek bidean utzi dituztelako gai oso garrantzitsuak»: gutxieneko lanaldiak zehaztea, etorkizuneko kolektibitateetarako hitzarmen baten aplikazioa aurreikustea, eta kate handi eta markak hitzarmenaren eremu funtzionalean sartzea.
Etzi mobilizatuko dira horiek. SEA patronalaren egoitzan elkartuko dira, 10:00etan. LABek argi utzi du ez duela ulertzen gainerako sindikatuek «eduki minimoetara jo izana mobilizazio ziklo batera jo beharrean».
