D’Anjouk udarako zehaztu nahi ditu Euskal Finantzen Aliantzak egingo dituen lehen inbertsioak

BGAE-ei egin die dei, aliantzak sustatu nahi duen inbertsio pribatuaren oinarrietako bat izan daitezen. Egun, haien ahal ekonomikoaren %1 baino ez dute inbertitzen Araba, Bizkai eta Gipuzkoan.

Noel D'Anjou Ogasun sailburua, gaur, Bilbon emaniko hitzaldian. BERRIA
Noel D'Anjou Ogasun sailburua, gaur, Bilbon emaniko hitzaldian. BERRIA
Imanol Magro Eizmendi.
2025eko martxoaren 31
12:55
Entzun 00:00:0000:00:00

Noel D’Anjou Eusko Jaurlaritzako Ogasun sailburuak udarako martxan nahi du Euskal Finantzen Aliantza. Epe hori jarri dio bere buruari babestu beharreko lehen egitasmoen zerrenda osatu eta haiek diruz laguntzeko. Aliantza horren asmoa 3.000 milioi euro pribatu mugitzea da, eta horretarako inplikazio handiagoa eskatu die BGAE borondatezko gizarte aurreikuspeneko erakundeei; haien zifren arabera, %1 baino ez dute inbertituta Araba, Bizkai eta Gipuzkoako enpresetan: «Langileek haien BGAE-etan batez beste 36.000 euroko aurrezkia badute, 360 bakarrik daude inbertituta euskal enpresetan. Ez da nahikoa».

D’Anjouk Bilbon emaniko hitzaldi batean xehatu ditu bere asmoen epeak, gaur. Jaurlaritzak martxo hasieran aurkeztu zuen inbertsioak sustatzeko bere aliantza finantzario publiko-pribatua. Sailburuak azaldu duenez, hura kudeatzeko lege aurreproiektua egina dago, eta Eusko Legebiltzarrera igorriko du apirila amaitu aurretik. Behin onartuta, udan egin nahiko lituzke lehen inbertsIoak.

«Langileek haien BGAE-etan batez beste 36.000 euroko aurrezkia badute, 360 bakarrik daude inbertituta euskal enpresetan. Ez da nahikoa» NOEL D'ANJOUEusko Jaurlaritza Ogasun sailburua

Diru horren helburua zehazteko inbertsio plana udan jasoko du sailburuak. Planak «lur hartu» dezala nahi du, bai eta «helburuak» zehaztea ere. Lan horren lehen pausoak Zabala Innovation aholkularitzaren esku utzi ditu. Industriaren eraldaketa sustatzen duten proiektuak bultzatzea du asmoa, eta bi arazo jakin ezabatzea:  enpresa ertain eta txikiek hazteko dituzten oztopoak eta enpresa batzuetan belaunaldi aldaketari lotuta dituzten arazoak. Eta zer sektoretan? «Deskarbonizazioan, teknologia berrietan eta defentsan».

Lege aurreproiektuen ñabarduren zain, D’Anjouk aliantzaren berri ematean adierazitako datuak errepikatu ditu: Jaurlaritzak mila milioi euro jarriko ditu 3.000 milioi mobilizatzeko, eta hor nahi ditu BGAEak Jaurlaritzak: «Premiazkoa da BGAEak eta aliantzak bultzatu nahi dituzten egitasmoak norabide berean bideratzea, eta arauak aldatuko ditugu hori posible egiteko». BGAE-en egungo legeak 42 urte ditu, eta sailburuak hura berritzeko beharra nabarmendu du.

Sailburuak haien gihar finantzarioa goratu du: «30.800 milioi euroko ondasuna dute, EAEren barne produktu gordinaren heren bat da hori». Iragan astean, BGAE-en federazioak bere urteko balantzearen berri eman zuen, eta esan zuen euskal enpresetan gehiago inbertitzeko prest zeudela, baina ez zutela eskaintzarik jasotzen. Jaurlaritzaren esku jarri zuten egitasmoak aurkitzea, eta badirudi oraingo honetan bi erakundeak bat datozela. Hala ere, federazioak ohartarazi zuen oso zuhurrak izango direla, eta ez dutela arrisku operaziorik egiten.

Zorpetze ahalmena handitu

Bere hitzaldian, zorpetzeko aukeraz ere mintzatu da D’Anjou, eta aurreratu du gehiago zorpetzeko eskubidea eskatuko diola Espainiako Gobernuari. Aste Santuaren aurretik da biltzekoa ogasunen batzorde mistoa, eta mila milioi eurora igotzea da asmoa, besteak beste finantza aliantzaren premiak asetzeko.

Hori ez da izango bilera horretan mahai gainean izango duten gai bakarra. Espainiako Gobernuak bere menpeko hainbat erkidego autonomori estatuarekin duten zorraren zati bat barkatzeko asmoa du, eta D’Anjouk aipatu du erabaki horrek «inondik ere» ezin duela eragin EAEk kupoaren bitartez gehiago ordaintzea: «Erantzukizun handiz jokatu dugu, eta ezin gaituzte zigortu». Bi erakundeen arteko harreman onak ikusita, bi asmoak arazorik gabe lortu beharko lituzke Jaurlaritzak.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Kazetaritza propio eta independentearen alde, 2025 amaierarako 3.000 irakurleren babes ekonomikoa behar du BERRIAk.