FV Ubalza II izeneko zentral fotovoltaikoa eraikitzeko proiektua aurkeztu du Cañaveras Solar enpresak Eusko Jaurlaritzaren aurrean. Euskal Herriko Agintaritzaren Aldizkariak gaur argitaratu duenez, egitasmoak aurreikusten du 48.960 eguzki plaka eraikitzea Araban, Aguraingo lurretan.
Azpiegiturak 30,9 megawatteko potentzia izango luke, eta lau kilometro pasatxoko tentsio ertaineko linea baten bidez konektatuko litzateke Donemiliagako subestaziora, Irurita-Gaunako eremu bat zeharkatuta. Proiektuaren aurrekontua hamabost milioi eurokoa da.
Eusko Jaurlaritzaren Industria, Trantsizio Energetiko eta Jasangarritasun Sailak martxoaren 27an sinatutako iragarkian, jasoa dago enpresak aurkeztuak dituela eskaerak proiektuaren aurretiazko administrazio baimena, eraikuntza baimena eta ingurumen eraginaren adierazpena eskuratzeko.
Iragarpenarekin batera, 30 eguneko epea ireki da proiektuari alegazioak aurkezteko.
