Ostegun arratsalde honetan 55 urteko gizonezko langile bat hil da Agoitzen (Nafarroan), eraikuntza batean lanean ari zela istripu bat izanda. Gizona hamar metro ingurutik behera erori da. Sindikatuen zenbaketaren arabera, aurten Euskal Herrian hamasei behargin hil dira lan istripuetan.
Nafarroako Gobernuak jakinarazi duenez, SOS Nafarroako larrialdiak kudeatzeko zentroak 15:56an jaso du ezbeharraren berri, eta Agoizko mediku taldea, anbulantzia medikalizatu bat eta Foruzaingoaren patruilak bidali ditu gertakarien lekura. Larrialdi zerbitzuek ezin izan dute ezer egin langilearen bizia salbatzeko, eta bertan hil da.
Foruzaingoaren Brigada Judizialak ikerketa abiatu du zer gertatu den argitzeko, eta gorpua Nafarroako Auzitegi Medikuntzako Institutura eramango dute, autopsia egin diezaioten.
