Abenduaren 20an Gipuzkoako Foru Aldundiko Kultura, Lankidetza, Gazteria eta Kirol Departamentuak urtero antolatzen duen Kirolgala ekitaldia egin zen Irungo Ficoba erakustazokan. Protagonistetako bat Maialen Chourraut izan zen. Distira saria jaso zuen, arrakastaz betetako bere ibilbideagatik. Bost Olinpiar Jokotan parte hartu du, eta merezitako hiru domina eskuratu ditu: urrea 2016ko Rioko Olinpiar Jokoetan, zilarra 2020ko Tokioko Olinpiar Jokoetan eta brontzea 2012ko Londresko Olinpiar Jokoetan.
Beste une garrantzitsu bat Iñigo Llopisi eta Irati Lacunzari 2024ko Gipuzkoa Kirolak saria eman zietenean izan zen. Iñigo Llopis igerilariak, aurtengo Parisko Paralinpiar Jokoetan urrezko eta brontzezko dominak lortu dituenak, ezin izan zuen bere poza ezkutatu aintzatespen hori jasotzean, harentzat ahaztezina izan den urte honi amaiera ederra ematen baitio. Irati Lacunzak ere ez. Urpeko igerilaria eta 400 eskafandra modalitateko munduko txapeldunordea da, eta jaso zuen sariak hegats-igeriketaren eta hura bezala egunero hobetzeko eta bikainak izateko gogor entrenatzen diren kirolariek egiten duten ahaleginaren balioa azpimarratzen du.
Martin Berasategi
Aurten Martin Berasategiri eman diote Kirol Enpresa saria, Gipuzkoako arraunari egindako ekarpenagatik eta, zehazkiago, Donostia Arraun Lagunak taldeari egindako ekarpenagatik. Gaztetan, talde horretan arraun egin zuen, eta balio horiek sukaldaritzaren munduan aplikatu ditu, galan hari buruz eman zuten bideoan nabarmendu zuten bezala.
Aurtengo Parisko Olinpiar Jokoak zirela eta, Gipuzkoako Foru Aldundiak omenaldia egin nahi izan die Olinpiar eta Paralinpiar Joko guztietan urrezko domina irabazi duten kirolari gipuzkoarrei: Richard Oribe, Sara Carracelas, Iker Martinez, Xabi Fernandez, Nagore Gabellanes, Maider Telleria, Teresa Motos, Mikel Lasa, David Villabona, Beñat Turrientes eta lehen aipatutako Llopis eta Chourraut.
Era berean, aurtengo Olinpiar eta Paralinpiar Jokoetan parte hartu duten Gipuzkoako kirolariak aintzatetsi zituzten: Janire Gonzalez (surfa), Nadia Erostarbe (surfa), Andy Criere (surfa), Miren Lazkano (piraguismoa ur bizietan), Pau Etxaniz (piraguismoa ur bizietan), Begoña Lazkano (piraguismoa pistan), Alain Kortabitarte (skateboard), Maitane Etxeberria (eskubaloia), Imanol Garciandia (eskubaloia), Fernando Mitxelena (tiroa), Amagoia Arrieta (boccia), Dario Brizuela (saskibaloia), John Cabang (atletismoa Filipinetako selekzioarekin), Ander Cepas (mahai tenisa), Nahia Zudaire (igeriketa), Kauldi Odriozola (eskubaloia), Alex Aranburu (txirrindularitza) eta Beñat Turrientes (futbola), Maialen Chourraut (piraguismoa ur bizietan) eta Iñigo Llopis (igeriketa) sarituez gain.
Naroa Zubimendi eta Manolo Kortajarena
Naroa Zubimendi izan zen ekitaldiko ezustekoa. Santiagotarrak taldeko arraunlariak, 23 urtez azpikoen kategorian munduko txapeldunorde izan denak, herri bozketaren saria irabazi zuen, 4.193 botoetatik 839 lortu baitzituen. Kategoria horretan, herritarrek Gipuzkoako kirolaren balioak hobekien irudikatu dituzten kirolarien edo kluben alde bozkatzen dute, eta aurten arraunlari gazte hori izatea nahi izan dute. Halaber, Manolo Kortajarenak Boluntariotza Saria jaso zuen boxeoari egindako ekarpenagatik.
Urteurrenen atalean, talde hauek nabarmendu ziren: saskibaloiko Askatuak Kluba, eskubaloiko Iraurgi kluba eta Eskubaloia Olagarro kluba, 50 urteko jardunagatik; Aloña Mendi mendi taldea, Jaizkibel mendi taldea eta Antiguako Mendizale Elkartea, 75 urte betetzeagatik; eta Eibarko Kirol Kluba eta Loiolatarra kirol kluba, mendeurrena betetzeagatik.
Jokin Altuna, Bera Bera eta Donostia Arraun Lagunak
Jokin Altuna pilotaria, Bera Bera kluba eta Donostia Arraun Lagunak taldea ere omendu zituzten, 2024an lortutako kirol merituengatik. Altuna, bere hirugarren buruz buruko txapela janzteagatik; Bera Bera, aurten Erreginaren Kopa, Liga eta Iberiar Superkopa irabazteagatik; eta Donostia Arraun Lagunak, denboraldi honetako Kontxako Bandera eta Euskotren Ligako estropada guztiak irabazteagatik.
Iosu Yerreguik eta Verdini dantza taldeak jarri zioten ukitu artistikoa ekitaldiari, eta Maite Eskarmendi eta Asier de la Iglesia izan ziren aurtengo Kirolgalako aurkezleak.
