Zegokion egunean, zegokion orduan, telebistaren aurrean: «Goazen lagunok amets betean/ dragoiaren bola bila batera/ Orain badakit nongo zuloan/ dagoen altxorrik ederrena». Makina bat ordu igaroko zuen batek baino gehiagok Dragoi bola ikusten, eta atsekabetuta izan, joan den astean, Akira Toriyama telesail horren sortzailearen heriotzaren berri. Urruti samar geratzen diren oroitzapenak astindu ditu horrek.
Hori dela eta, BERRIAk jakin asmo du bere irakurleek zein marrazki bizidun gogoratzen dituzten, eta sare sozialetan bota du galdera —BERRIAlagunek albiste honen iruzkinetan ere erantzun dezakete—. 1980ko hamarkadan ETB1 ikusten zuena oroituko da Aralez, Harlock kapitainaz... «Ez dakizula nor den Dotakon?», esango dio Martin Mistery ikusten hazi zen gazteari, eta azken horrek galdetu: «Eta zuk ezagutzen al duzu, ba, andereño Kizkurne?». Belaunaldiak belaunaldi, euskarazko telesailek iruditeria oso bat eraiki dute horiek ikusi zituztenengan —edo, hobe esanda, horiek telebistan ikusteko aukera izan zutenengan—.
'Dragoi bola'-ren sortzailearen heriotzak telebista aurrean igarotako orduak oroitzeko balio izango zien askori. Ondorioz, zera jakin nahi du BERRIAk: zein marrazki bizidun dituzte gogoan euskaldunek?@otaegileonet
— Berria.eus (@berria) March 11, 2024
Erantzun txio honetan 👇🏿https://t.co/Rtj2zVpa6x
Izan Ane, Elene eta Tereseren bihurrikeriak, Sin Chanek jasotzen zituen kaskarrekoak, Doremiren Magia-n zapo bihurtu zen Majorika sorgina, Lazkao Txikiren bertsoak, Luffyren One Piece altxorra aurkitzeko grina, Hartz Txikiren kuadrilla, Berebiziko Espioiak eta hirukotearen tramankuluak, edo Sakura, kartak zakura-ko abenturak —ederra da hitz jokoa—, atzera begira jarri besterik ez da egin behar bat-batean esateko: «Nola deitzen zen komikiarekin bainugelan agertzen zen neskatoa? A, bai, Nonochan! Eta mailuarekin zebilen dinosauroa?». Beste batek: «Muka Muka!».
