Urtero bezala, Ezkila kapitainak eta Matti laguntzaileak txupinazo pirata botako dute. Mattik aldarri bat izango du, Piraten balioekin bat datorren elkarte edo talde batek ordezkatua. Zaporeak elkartea aukeratu dute aurten. Haiek botako dute txupinazo pirata, Ezkilarekin eta Mattirekin batera. Zaporeak, Europara iristen diren errefuxiatuei janaria eskaintzen dien irabazi asmorik gabeko elkartea da. Egun, Grezian dauden errefuxiatu esparruetan otorduak ematen dituzte. Elkartearen helburu nagusia, pertsona zaurgarrien bizi baldintzak hobetzea da.
Aurreko urteetan ordezkatutako erakundeak izan dira, besteak beste, Martuteneko Auzo Elkartea, etxe kaleratzeen aurkako kolektiboa, abortu eskubidearen aldeko mugimendua, errefuxiatuak, Altsasuko gurasoak, merkatari txikiak, Naizen elkartea edota Euskal Herriko Bilgune Feminista.
Donostiako Piratek iazko egitura berreskuratuko dute aurten. Zortzi eguneko egitaraua prestatu dute, eta hainbat ekintza antolatu dituzte Flamenkan —Piraten Aste Nagusiaren erdigunea—, Guardetxean eta Trinitate plazan. Festa, hainbat ekitaldiz osatuta dago: bertso saioak, kalejirak, kuadrilla arteko jolasak, play-back lehiaketa, azoka, herri bazkaria... eta noski, abordatzea.
Haurrek ere euren programa izango dute: «Gazteenek partxea jantzi eta pirata izateko aukera izango dute». Ur jolasak, disko-jartzaile tailerra, abordatze txikia... Donostiako Piraten ikur bilakatu dira abordatzeak. Aurten abuztuaren 14an botako dituzte ontziak itsasora. Parte hartu ahal izateko, abuztuaren 1ean zabalduko duten zerrendan izena eman beharra dago.
Tokiko musika lehentasun
Flamenkako eta Trinitate plazako gauek euskal musika eskaintza zabala izango dute. Bertan izango dira, besteak beste, Iratzar erromeria, Nogen, Olaia Inziarte, Esne Beltza... Euskal musikari eta tokiko artistei eman diete lehentasuna. «Programazio askotarikoa, euskalduna eta feminista sortu dugu», adierazi du Urbietak.
Ane Telleria piraten bozeramileak talde feminista ere martxan dagoela azpimarratu du: «Jaiguneetan erasoak salatzeko aukera izango da [puntu morea], eta Bulebarrean erasoak artatzeko eremu bat egongo da». Udalarekin elkarlanean puntu more horrek 21 orduz lan egin dezan lortu dute, 13:00etatik 10:00etara. «Erasoak artatzeko gune gehiago eskatu ditugu, bakarra ez baita nahikoa». Aurreko urtean gertatu bezala, ez dute lortu. Piratek barne protokolo bat landu dute erasoen aurka.
Donostiako Aste Nagusi Pirata
Abuztuaren 12tik 20ra bitartean,Donostian.
