Iker Markinezek zainzuriak eta antxoak oinarri hartuta prestatu du aste honetako errezeta.
Nafarroako zainzuri freskoak, bi dozena Antxoak, 500 g Tipula Piper berdea Sagar ozpina Modena ozpina Oliba olioa Azukrea
Udaberriarekin batera, sasoi berriko lehengaiak ditugu jada gure merkatuetan. Gaurkorako, hasi berriak diren zainzuriak aukeratu ditugu, antxoekin batera. Zainzuriak prestatzen hasiko gara lehenik. Horretarako, zainzuriak ipurdi aldean zentimetro inguru moztu, eta, ondoren, goitik behera zurituko ditugu. Kontuan hartu punta aldea ez dela behin ere zuritu behar.
Lapiko handi bat urez bete, gatza bota, eta azukre pitin bat ere bai. Irakiten hastean, zainzuriak gehitu eta ordu laurden batez irakin; zainzurien lodieraren arabera, beharbada, denbora gehixeago eduki beharko dugu irakiten. Ondoren, sua itzali eta zainzuriak bertan utzi.
Oliba ozpina prestatuko dugu jarraian. Horretarako, tipula eta piper berdea ahalik eta puskarik txikienetan moztu, eta ontzi batean jarri. Gatz pitin bat, sagar eta modena ozpina eta oliba olio txorrotada bat bota. Neurriak, normalean, hauek izaten dira: ozpin zati bakoitzeko, hiru olio txorrotada. Bi ozpin erabiliko ditugu gaurkoan, mota bakoitzak bixitasun ezberdina gehituko baitio platerari.
Antxoak erditik ireki, eta erdiko hezurra kendu. Sukaldeko paper batekin lehortu, eta banan-banan gatz pitin bat bota. Labeko erretilu batean jarri, erabat irekita eta azala gora begira dutela. Oliba txorrotada bat gehitu gainetik.
Labea berotzen jarri, 250 graduan. Erabat ondo berotu arte, antxoak ez ditugu sartuko. Labea bero-bero dagoenean, antxoak sartu, eta hiru minutuz eduki bertan; nahikoa izango da. Izan ere, antxoa oso haragi fineko arraina da.
Platera muntatzeko, zainzuriak uretatik atera eta bi zatitan moztuko dugu bakoitza. Platerean txukun kokatu; lehenik, zainzurien txortenaren aldeko puskak jarri, eta gainean puntuen aldeak. Ondoren, antxoak zainzurien punten gainean jarriko ditugu. Azkenik, oliba ozpinarekin ondo busti dena.
